Noted dö gebam tedelik Volapüka

Eduinobs mödumikna vobädamis tedelik smalik ko Flentän e Deutän dub volapük, keli kanobs penön föseföl obis zelädikumo das pokapälobs ka penölo flentapüko u deutapüko, tosü elenadön vöno pükis at du tim lonedik.

Ab ädatikobs bletimo blufön mögi tefü duinam spoda tedelik ko Cinän volapüko. Bi no äsevobs tedeli anik cinänik kel äspodom volapüko, epenobs in pük at söle cinänik in Amoy, ed ebegobs omi golön al tedel sembal cinänik keli äsevomla e bekön omi sedanön paunis semik tieda obes dub päkedapot. Esedobs ötüpo potakomiti al pelön plo tied e plo potamon. Pened pegetom pötatimo pepenöl volapüko kel enunom obis das päked pisedanom, e tied enakömom in Sydney za pos vigs kil in stad gudik.

Natiko, binos med boso kostik al ninsedön tiedi, getön omi dub päkedapot, ye blüf at eblöfom das ted kanom paduinön atüpo, ünü mieds semik, ko Cinän dub volapük: e kanon nömodön zu, das tedel cinänik esedanom tiedi levemo gudik obes.

Se Kosmopolan 1891, Nüm: 3, Pads: 59-60.