On vesin
| ←Sù i mezzanitt | On vesin (1894) by |
L'è inscì!.....→ |
Che luder d'on omett! L'è on azzalin
Che ciappa foeugh apènna a strusagh dent:
El gh'ha duu œucc birboni de foin,
E ona lenguascia che ve disi nient.
Coi sò ball, coi morgninn, coi compliment,
El tira semper l'acqua al sò molin...
El fa l'indian, sta stoffa, l'innocent,
E intanta el slonga i man sul moresin.
El gh'ha ona piega, pœu, ona manera
Che poden minga nanca digh quaicoss;
Anzi i servott se fermen volentera
A giavanà, a faghi di bei gross,
Quand l'incontren sui scal, su la linghera...
Ma gh'è on quai bulo ch'el ghe stà sul goss..