Pöträt nögafomik
(Koned fa el ‚E. A. Poe‛)
Kased, ini kel dünan oba inüdranom mekädo - dat ob, in stad vemo pävunöl, no ömutoböv lifädön neiti in nated - äbinon bal bumotas gianagretik ut, bal bumotas lafo magifik e lafo glumidikas utas, kels ätopons e jenöfo sis lunüp löpo nilü gufurs penenas, ed in magäl läda ‚Radcliffe‛. Luveratiko pilüvon pas bü tim brefik diseinü lüv no lunüpik. Äblümükobs obes cemi smalikün, kel zuo no älabon lüxüödi möbas in cems votik logädiki. Cem obas ätopon in tüm fagoseatik kaseda. Deks in spadäd at ädabinons bundano, do äbinons bäldiks e dilo igo voriks. Völs cema pädekons dub tapeds, zuo pätegons ko tropeds vemo mödiks vafas valasotik, e dub pänots plödakösömiko mödiks, kels äträtons spiritiäli vemik vogädik pänana, e kels älagons in frems pägoldöl. Pänots at älagons len völs noe su sürfats noik abi in niks vemo mödiks, kels idavedons dub bumamod bisarik kaseda. Ba äjenos dub delir oba, das pänots at äsüükons obe nitedäli vemik. Demü atos äbegob ele ‚Pedro‛ ad färmükön kläpedis vetik, e - bi neit ya ikömon - ad filidön kandelis kandelastanäda, kel ästanon nilü kapadil beda obik, e fino ad seatirön lölöfiko körtenis plifagik binü veluv blägik, kels ädoniolagons züo fo bed. Posä atos pidunon, ädesirob, das üf no ökanoböv slipön, nemu ökanoböv lelogön rezipiko pänotis at, e reidön tefikosi in buk smalik semik, keli ituvob su kusen beda, e kel äninädon krütis e nünis tefü pänots in cem älagöls.
Lunüpiko, vemo lunüpiko äreidob, e devodiko älelogob pänotis. Vifiko äs böds flitöl düps äpasetikons, e fino zeneit stilik äpubon. Stanöp kandelastanäda no äpliton obi, ed ad no tüpön dünani slipöl, ätenükob ko töb vemik nami obik, ed äfeapladob stanádi somo, das litastrals ädrefons gudikumo buki.
Dun at äkodon ye vobedi no pispetöli. Litastrals kandelas mödik (ibä mödiks äbinons in kandelastanäd), ädranons nu ini nik semik cema, ini nik, kel büo itopon in jad vemik dub bal bedastafädas. Us älogob nu in lit klilik magodi, keli büo leno iküpob. Äbinon as pöträt jilepula yunik, kel ebo äcenof ini stad voma. Älelogob dü brefüp pänoti, e täno äfärmükob logis obik. Ünü timüls balid dun at igo äjenon nen tikod patik. Ab du logalips oba äblebons färmiks, ämeditob vifiko kodi färmükama logas obik. Atos bo ijenon as muf süpik ad getön timi saidik pro tikod tefik, ad süadükön obi, das vision oba no icüton obi, ad takedükön ed ad mütön magäli oba pro loged kuratikum ä fümikum balidfovik. Pas pos timüls anik dönu älülogob lunüpiko pänoti.
No ävilob e no äkanob dotön, das nu älogob vali verätiko, iba gesviet balid kandelas su linumastof imoükon luveratiko ninäli drimöfik, kel ivegon äsä tifan da siens obik; igalükon obi süpiko ad lifastad galik.
Pöträt ämagulon, äsä ye esagob, jilepuli yunik. Äjonon teiko kapi e jotis, e pipänon bai mod ut, kel me jäfüdavöded panemon as vinyät, vemo bai stül kapas buik pänana: ‚Sully‛. Brads, blöts ed igo finots herema nidik äcenons neküpoviko ini jad nefümik dibik, kel äbinon as pödaglun pänota lölik. Frem äbinon nögafomik, vemo pägoldöl, e ko filegranavobods fomü morots. As lekanot nos votik äkanonöv binön stunidabikum ka pänot at. Ab ni ledun pöträta, ni lejön sublimik jipösoda ikanons davedükön fäkädi süpik ä vemiki oba. Leno ämögos, das magäl obik, ägaliköl se slip lafik, ikanon cedön pöliko kapi pöträta kapi lifik pösoda at. Ädasevob sunädo, das pats magoda, vinyäta e frema ämutons sunädo moükön tikodi tefik, das igo ämutons sunädo tikodi fibikün somiki ünü timül brefikün. Ämeditob vemo dinädis at, äletikob dü düp bal dö atos, lafo äseadöl e lafo ästutöl su kusens, nu logs e siens oba äjäfons teiko ko pöträt at. Täno fino, in stad kotenik dub dasev kläna jenöfik e vobeda onik, ädoseitob obi dönu in bed. Ituvedob kläni at; äbinädon me süm lölöfik notoda, kel balido ibluvükon obi, idadränälon obi e kel igo ijeikon obi. Ko senäl dremik divoda ägepladob kandelastanädi sui plad büik oka. Posä imoükob somo kodi fäkäda obik se mög logama, älasumob sunädo buki, kel äninädon nünis dö pänots e dö jenotems pänotas. Ämaipadölo padi ut, kel äninädon nünis dö pörträt nögafomik, äreidob us setis siämik ä bisarikis, kels sökons is:
„Äbinof jilepul jönik, leigo jönik äsä yofik. E tim ut äbinon mifätik, ün kel älogof ed älelöfof pänani, ed ün kel ämatikof ko om. Om älifom as man lefäkik, letikik vobiälik, e dub löf lefäkik pro lekan oma ädalabom äsvo ya jigami; of ye älöfof fredi e smili, ed äbinof so yofik äsä paf, fulü löf e flät kol dins valik, e hetöl teiko lekani, kel ädabinon äs taan ofa; ädredälof teiko lo palät, lo köfs e stums tefik votik, kels ämosumons ofe himatani. Kodü atos äjekof vemo, ven himatan ofa äspikom dö disein oka, ad pänön igo ofi it: jimatan yunik. Äbinof ye dälälik e lobediälik, e so äseadof mükiko dü vigs mödik in tümacem dagik löpik, kö lit paelik älitükon te löpao linumastofi gedik. Om: pänan äjäfom leziliko ko vobod oka, kel äprogedon ünü düp alik, ünü del alik. Ed om äbinom lefäkik, bisarik e vimik; suvo äreafom ini drimäls, sodas no ävilom dasevön, das lit, kel änüdranon so späkiko ini tümacem soalik at, ävesetükon sauni e lani jimatana omik. Dub atos ädeiguirof, e mens valik ädasevons liedi ofa, pläamü pänan it. To atos äsmililof ai ed ai dönu, nen plons, bi iküpof, das pänan (kel äbinom pänan vemo fmaik), äsenälom juiti gretik ä ledesiriki dub bligod at, e bi äjäfom delo e neito ad magulön su linumastof jimatani, kel älelöfof omi so vemo, jikel ye i ün del alik äläsikof tefü lan e saun. Äsenälof trodi semik, ven mens ut, kels ilelogons pöträti, äspikons me vöds nelaodik stunida dö süm voätik, dö milag gretik, e dö blöfs tel: dö ut skila milagik pänana, e dö ut lelöfa vemik kol of, bi ipänom ofi me mod no pluamovik.
Täno ye, ven vobod änilikon lä fin, nek fovo nog ädalon kömön ini tüm; ibä pänan ästadom in fäkád sovadik, äsvo glutik dub vobod oma, ed ädeflekom te nemödiko logis de linumastof, ebo te ad xamön logodi jimatana omik. E no ävilom suemön osi, das köls, kelis äpänom sui linumastof, pädetirons de cügs jiutana, kel äseadof nilü näi om. E posä vigs mödik ipasetikons, pöträt pifimekon pläamü liun lätik bal love mud, e pläamü köl bosik sui log; nu lan läda äsvo älöflamon nogna, äsä flam lampada bü kvän.
E täno liun piledunon, e köl piläükon; dü tim brefik pänan ästanom dafrediko fo vobod, keli ijafom; ab ün timül balidfovik, du nog älogetom usio, ädremom ed äpaelikom vemo. Ävokädom me vög laodik: „Vö! atos binon jenöfo lif ekopiköl!“ Täno ägüflekom ki[1] vifiko ad lelogön jilelöfäbi oka - ideadof.“
NOETS. (Vükifonät)
- ↑ Bükapök; pla: „oki“.
Se Volapükagased (Zänagased pro Volapükanef) 1963, Nüm: tobul, Pad: nen padanüm.