„Sanonto boelă apèkker bărinto: mon njata ongghoe anḍi' èlmo kasoghiăn, tanto abă'na ta' kèra mèskèn, masțè soghi, karana taḍă' orèng sè ta' terro soghiă. Anangèng pèkkèran boelă ropana ghi' tjopet, sarta tjè' partjadjăna, djhă' abă'na tao masoghi orèng ongghoe. Molana sabhărăng pamènta băn parèntana bi' boelă ètoro' bhăi. Ḍă'-aḍǎ'na boelă èsoro apowasa nem arè; ka pèttong arèna èsoro terros tondjhoeng, ta' ollè alalakon pè-napè, ta' ollè ngèḍingngaghi sabhărăng sè èkaèḍing, ta' ollè arassa'aghi sabhărăng sè èkarassa, ta ollè ngabăs sabhărăng sè ètangalè. Băn polè boelă èsoro apowasa sabbhăn arè katerbi'ăn boelă; sabbhăn malem Djhoema'at băn Salasa èsoro arasol."
„Laèn ḍări sè kasebbhoet, sèpat boelă èntar ka bengkona otabă aba'na èntar ka bengko boelă, masțè boelă aberri' pèssè sasangon; napè polè sasoghoen, pon ta' kaètong.”
„Parandhinèng boelă sè alako tjara ghǎņèko taker ḍoe taon abiddhă, anangèng ghi' mato mèskèn bhăi, ta' ètapak rassana soghi.”
Djhoertolès: „Ma'na Sarpan ban addjhi Djoenos ghǎrowa anḍi' èlmo napè?”
Ma'na Iswad: „Kabărră hăddjhi Djoenos sareng ma'na Sarpan ka'into ahli njeppè è bhoedjoe' karamat (è Tjarebbhoen), sè terro lekkasa soghi. Pya, mon kaoelă ta' terro nèroana kalakoanna orèng sè kaḍoewǎ ka'into, sabăb sanaddihan aba'na soghi, tapè taḍă' ghoenana, marghă pamatèna sasar. Èngghi lerres orèng njarè èssèna taboe' panèka parlo, tapè manabi saka'into djhoe ta' anjama tasara ḍhimèn.”
Djhoertolès: „Napè parlona rèng-orèng koṭṭa sèpat boelăn Molod ma' bănnja' sè èntar ka Tjarebbhoen?”
Ma'na Iswǎd: „Ka'into èngghi aghaghoeroe kasoghian djhoeghăn, tjoma saos kabǎrrǎ kasoghian sè èkaollè ḍări kaissa' saè, sabăb sè èèntarè bhăngsa walioella, tor mal-amalanna taḍa' laèn nèng kodhoe bhǎdjheng alako ibădăt ka Ghoestè Alla sareng kodhoe abhăḍhi kasaèan ka sadhădjă orèng.”
„Anangèng manabi èkèr-pèkkèr padjhăt lerres saka'into ongghoe, karana manossa ka'into ta' kèra ghellem soghi, manabi ta' aghoeroe.”
„Parkara aghoeroe, panèka băḍă kalabăǎn djhălăn kasaèan, băḍă sè kalaban djhălăn ta' djhoedjhoer, akadhi orèng sè ngoboe bhoenḍoel, aradjhă sareng èn-laènna.”
„Anangèng bhădhăn-kaoelă anḍi' mo-sarmoan sè aghăghoeroe ka Tjarebbhoen djhoeghăn, kèra bhadhăn-kaoelă abǎ'na palang, kantos mangkèn pagghoen mèskèn saos.”
Haddjhi Băkkri: „Sanonto boelă terro taoa, napè èlmona dhin Mantrè-landbouw ghǎrowa”
Djhoertolès: „Lă, ghǎrowa dhin Mantrè pon ḍateng! Sènga' tan-tarètan, paḍă todjoe' abhăris pateppa'!”
