Масторга инголи
Молихне минь
Эряфонь тиихне,
Азорхне минць —
— Трудяйхне,
Ударниконь вийнеськ.
Партиясь вятинеськ,
Партиять лемса
Шорсихнень, вракнень
Кистонок тяйсаськ
Социализманкса
Инголи кинеськ.
Мяльнеськ минь фкя:
Кулачествать каршес
Тюремс и тюремс
И кемоста ащемс
Партиять
Ленинскай китьксса.
Касфтомс завоттнень
Гигантнень, совхоснень,
Хозяйственнай ширьдя
Коммунатнень артельхнень
Кемокстамс
Кемоста, вишкста.
„Инголи сатфксонкса“ —
Партиясь терди
Анокт ударникне!
Кия минь кирьди?
Серьгяткснень ширес
Аф кацаськ!
„Сатомс и йотамс“...
Валхне нят кинь?
Минцень-трудяйхнень
Од эряфонь тииень
Мяльнеськ тя минь,
Тяса уцяскась. *)[1]
Колхозник, ударник —
Паксянь герой.
Шачфтонзя-касфтонзя
Тяниень койсь
Сякокс работак
Цебярьста, лацкас.
Вишкста, эсь пинкста
Пяшкочнемс платтнень,
Срафнемс пизоснон
Лядыкс кулакнень
Классфтома эряфти
Тенинь задачась.
|
|
Васеньце вастти —
Техникать содамац,
Цебярьста тонадомс —
Двигательть нолдамац
Вешсы тянь
Омбоце ветесь.
Кда паксяса
Синневи тракторсь
Али пяльксонза
Нолдайхть пелькс кашторф
Тонатт тон васцонза
Цебярьста петемс!
Тянкса тонга
Поэт, очеркист,
Эряфти, васенця
Ряттненди лисьть
Ульхть ударник
Строительствать йотксса.
Писателень валса,
Мораса, азксса
Масторти минцень
Геройнеконь азсаськ,
Няфцаськ тевса,
Аф йофксса.
Саты ни казендемс
Панчфненди мороцень,
Ширес тя пинкнень,
Пижя пря поратнень,
Тяшттнень и ковтькя
Ваймама кадомс.
Аньцек труць —
Ударникть работац
Азкссот улеза
Васень заботакс
Тонафнек, эряфста
Штоба аф лядомс.
Кемя и минцень
Пераця улеза,
Эряфонь увфста
Пилеця кулеза
Азксонди моронди
Тянинь темат.
Содак и мяляфтк
Эряфть эрь сатфксоц
Инголи классфтома
Эряфти аськолькст,
Аськолкснень, сатфкснень
Трудяйти поэмакс!
|
|
