| 88 | Андрей Чекашкин |
— Аш кода. Синь няйсак толть вакссонга аф эряйхть. Кда валдонять ваксса улельхть — нолдавольхть кафцке, а тяни няйсак фалу алашатьнень ваныхть. Ванонды тяни катк алашат колма исатьнень ала.
— Да, тевнеке пака лац молихть, — пшкятсь танга Вирьгусь.
— Тялоти самс ватт сяка „Энгельс“ колхозсь аф ули. Мезе аф няйтяма, а срафтсаськ.
Лоткафтозь фкя вастс алашатьнень и ушедсь Розгинць ялганцты указовама: „Тон куроконя мрдак куду, ату шарьхкотьтядязь, — тевоньке кальдяв ули. Монь тьнярс-ни учихть эсон. Юргинтть мархта тон тоса куроконя сяда корхтак, афоли согласиндай, копордафтк, сяда ляпоми и ули сон минне. Нятнень ланкс кафта тьожяньшка сяфтяма, вете сядть тонксаськ Юргинтти.“ Тя корхтамда меле синь аердсть фкя-фкянь эзда и тутсь* кажнайсь эсь киганза эряскадозь, штоба куроконя тиемс ушотф тевсна.
IV
Иляденьди мольсь колхозонь марстонь пуромкс. Шинь повесткась ульсь: — 1. Отчет правлениять киза-кувалмонь работанц колга. 2. Разнайхть.
Зойновть докладонц аделамда меле пренияса сявсь вал Юргицнь*. Сон стясь васцтонза, пильгонза кальдявста кирьдсть ронгонц эса. Рябой шамац сонь ащесь кода веляньбяльде кели пачка. Вяри кепетьф оцю шалхконц лангс круглай путерькскянь-путерькскянь лиссь ливось. Тяйняня, кода тувонь, сельмензон тетькозень пуромкс кудонь уголу, коса ащесь правлениянь сери шкапсь. Прястонза тапу, апак сеенчнек шяярец навсеф бта юрнай толти — тюжя.
— Ялгат, — пшкядсь Юргинць — Зойновсь тячи тейнек азондозе правлениять сембе кизакувалмонь работанц. Кода сон корхтай тевсь бта моли пяк цебярьста. Сьорось урядаф апак имафтт-арафтт, сьоронь анокламань максф планць пяшкодьф фкя килограммонь пес эсь пинкстонза. Озепне видефт эсь пинкстост и касыхть тожа цебярьста. Видьме сай кизоньди ули. Модась, кона савсь сокамс лов алу-сокаф. Трудашити саф кафкса килограпт — тожа аф кяльдяв. Колхозсь и колхозникне анокласть якшама тялоти. Культурнай работавовок ули. Ну, коза тят варжакста, бта фалу ули и фалу цебярь, а мон мярьгелень, што афсатыкссь фкя и сон пяк оцю. Афсатыкссь ся, што Зойнов ялгась и сембе правлениясь лац аф содай, кода эряй, месть работакшни эрь колхозниксь. Сон аф содасы, што йотксонок улихть колхозникт-ударникт, конат йорасазь колхозть срафтома эсь саламаснон мархта. Синь марсихть эсь карманцнон минь работнайнеськонь эзда. Ялгат, афолень корхта мон, но омбоце шись седисон потяй бта куй, кати мезе бта лакай потмосон. Ито афолень азонда, пелян пяк, синь салавань суски пинекс ащихть, пелян шовамда, но тячи аф ламда копордань и, воляц, мезе ули ся улеза.
— Паньдя, Юргин, кувалгафнить корхтамацень, азыть кить ся ломатне, — корхтась президиумса Зойновсь. — Азонтк мезе содат синь лангаст. Пелемс аш кинь эзда.
— Ся ломаттне вага кит, — няфтьсь сурса Юргинць Иван-атянь Васять и Петя-атянь Александрть ланкс, конат ащесть серьцек озада вальмять каршеса скомня ланкса, — синь и Митяньгя шавозь. Синь колхозсонок лувондовсть сембедонь цебярь ударникокс и ниньге комсомолецт. Шнаентть вага тяни! — ювадьсь кайгиста Юргинць
Секретарьсь сидеста сьормадсь Юргинтть валонзон и шуроста варжакснесь озада ащи колхозникнень ланкс.
Ня валхнень эзда Васять и Александрть ронксна валовсть кода лакай ведьса. Синь ашезь маря алдост ащи скомнять. Шамасна лофташкадсть-акшелгодсть акша котфокс. Пуромксста ащи колхозникнень ендолкс пря потмоваст йотасть кальдяв мяльхть ня кафта цьоратнень колга. Кяжи сельмеса и нолдаф нярьса ванць ни синь лангозост пуромкссь, кода врагонь ланкс и апак каштордтт учсть Юргинтть азондоманц, коста и кода содазень, што салайхне и шавихне синь. Юргинтть корхтама еткованза Васясь стясь и пшкядсь президиумти: „Дайте тейне вал! Няйсасть вдь сон васькафни“. — „Юргинць катк корхтай!“ — ивадьсь вайгяль пуромксса
