| НИКОЛАЙ ОСТРОВСКИЙ |
ГУДОК
Кулясь сянь колга, што польскяй жандарматне шавозь Глушко слесарть, срадсь пригородть правулканзон эзга. Сон сувась сембе уженятненди и пачкедсь сембеда крайса землянкатненди, конатнень эса эрясть беженецт, конат мусть эстиест аф лама пингень работа сахаронь тиема заводса. Сембеда ламось ломаньтнень эзда вансть Патлаень кудонц лангс, штоба эсь сельмеснон марта няемс видеть. Илядыхне фкя-фкяньди корхнесть тя случайть колга эсь кудснон маласа.
* * *
Баранкевичень заводса аделсезе работанц омбоце сменась. Главнай заводскяй ортатнень малас пуромсь од сменати работама сафонь оцю толпа. Кой-кона рабочайхне контрольнай будкать пачк йотасть заводонь цехненьди, илядыхне кулемок шавомать колга, лядсть орта лангс.
— Месть ащекшнетяда? Йотада, кортан теенть! — ювачнесь заводонь сире сторожсь.
— Кенерьтяма... Ниньге гудок ашель.
Андрейсь йорязе топкав уголень астатка порциять.
Частонь стрелкась нежечнесь колмоти. Кочегархне полафнесть 10 минутада сяда ингеле илятнень коряс.
— Кулить, Андрюша, — Глушкоть ляцезь ляхне? — мярьгсь теенза нежедемпачк сонь приятелец Дмитру кочегарсь.
Котельнай сувсесь од сменась, и Андрейсь кулезень отрывистай фразатнень:
— А ортатнень лангса кутерьма ушечни.
— Няить, охранникне тусть ласькезь тоза?
Вальмять ала кулевсь ляцема. Кочегархне варжакстсть фкя-фкянь лангс.
— Мезе тоса?
Несколька секундат сембе апак каштордт кулцондсть, невольна учсемок кайги ляцема вайгяльхть. Андрейсь куцьсь куцеманять эзга котелть кожухонц лангс. Вяря—колма тяйняня вальмянят. Фкясь синь эздост ульсь паньжада. Сонь эздонза няевсть заводонь ортатне. Тоса тиеньдевсь мезе бди аф ладнай. Ортатнень ингеле сембе плошадьсь прудязь прудяф народта. Кодама бди ломань куцьсь оградть лангс и мезе бди ювачнесь толпати. Ортатненьди фкя-фкянь мельгя ласькендсть легионерхне, конат арелякшнезь заводть.
Котельнаи ласьксь ряцок ащи машиннай отделенияста младшай механиксь пан Струмилсь.
— Мес тинь аф макссетяда гудок сменати? — пешкодкшнесь сон мезе ули виец.
Паровой двигательхнень увфсна паньнезень сонь валонзон.
— Коса Птахась? Максода жа гудок! — азонкшнесь Струмилсь. Няемок, што сонь кивок аф кулцондсы, механиксь соньць кярьмедсь канатти содонф шярямти, кона паньчсесы гудоконь клапонть, и ускозе сочнь алу.
Сембе кенькшнень эзда заводонь пирьфти кармась валяма народсь. Рабочайхнень йоткса — пялесна ават. Андрейсь вишкста валксь тияксть лангс. Струмилсь нолдазе шярямть и сон тозардавсь вяри, гудокть вайгелец лоткась. Аньцек тяни механиксь няезе Птахать.
— Коса тон шляндать?
