Тячи танга йоран морамс мора,
Йоран азомс кафта-колма вал.
Кулхцондт, ялгай, кулхцондт мокшень цьора:
Эрянь, касонь мутна ведень калкс.
Шачень монга сокаенди цьоракс.
Тряйзень аньцек калада кудняц.
Тю - тю лю - лю, — тидянезе морась.
Аш мезда андомс кельгема идьняц.
Арань корхтайкс. Таньцти суском анан.
Тейне максыхть — коське кши и ведь.
Козять иденц сельмеведь пачк ванан:
Идец пори копша мархта медь.
Апак лотксек шитне, кофне йотасть,
Начка сьоксесь, ламоксть меки сась.
Дуця пакшне вишкста меки потасть,
Эздодост пиземсь сетьмоняста прась.
Вирьса, садса, нармоттне аф морайхть,
Кукунясь кунара аф кукай.
Кельме кожфкясь велетненьди йоряй,
Шуфттнень пряста лопатнень шукай.
Кись рдазу, пизем ведьтне шудихть.
Акша ловнясь тячи, ванды прай.
Ласькан школав, ломатть нингя удыхть.
Ланксон щамтне — авардемаце сай.
Сяпи эряфсь лоткафтозе кизень,
Тонафнень лишь кафта кизонят.
Козянди работазь йотнель шизе,
Козяньпяли сиводьфолень, идьнят.
Нужань эряф... васькафтомань козясь, —
Оцю ломанькс тевонзон тиян.
Сякокс тейнь кяжи валса йорясь,
Сякокс сересь — «ламос тон удат!»
Шранц ваксса ярхцемацень пелят.
Кульса кортайхть: «Кшида пори лама».
Пеле веста шава вастти велят,
Шовдаванга шовданяста стяма.
Сизихть кяттне, стака шуфтонь сокась.
Паксяц оцю, аш келец аш пец.
Кальдяв эряфсь эрь ши седить токась.
. . . . . . . . . . . . . . . . . . .
Трудяй ломанць тяни эськинц няйсь.
