Вяри кепсесы.
Гайняйхть виреса
Нармонь моротне,
Видемс эрявихть
Паксянь сёротне.
Пуромсть схоткати
Сокай алятне,
Мархтост озада
Ащихть аватне.
Ушедсь корхтама
Вельсоветонь прясь,
Сон ульсь Полюнясь
Правдань азынясь:
— Козянь модатнень
Явсаськ ровнайста,
Кода аляти,
Станя авати.
Видьмофтомоти —
Ули видьмоньке,
Алашафтомоти —
Козянь алаша.
Явозь ровнайста
Козянь модатнень,
Эсь уманязост
Видезь сёротнень.
Тошналь эрямась
Пине козяти,
Корхнесь, анзякшнесь
Ашу сокайти:
— „Кие сявонди
Козянь парашихть,
Эстиенза сон
Оцю осал тись.
Тона шиста сонь
Кяльда сотнесазь,
Якстерь горнати —
Толти нолдасазь“. —
Изезь кулхцонда
Ашусь ся шири,
Тяни содасы —
Козясь васькафни.
Ошста ломань сась
Тевти лездома,
Полють мархта сон
Кочкась комсомолхт.
Нинге сяда пяк
Полють виец кассь!
