— Ким... — Каизе сёрманть — Ким... Одов ледстизе ды таго кармась ловномо.
«Ким поздоровт тенть кучи. Ниле-вете вал совхоздонть. Совхозось тюсонзо полавтызе. Директорось од — партиец. Ломанесь хозяйственной. Прянзо путсы хозяйстванть кис. Совхозонть ули комсомолонь ячейка, партиянь ячейка. Робочейтнень эрямо таркаст вадрят. Строинек од кудот. Сизьгемень кото процентт робочейтнеде яволявтызь эсь пряст ударникекс. Роботатано сдельна. Бригадатне эсь ютковаст пелькстыть. Пелькстыть башка робочейтнеяк. Нарчук, дядя Костя, Морозов ды Коля Абрахимин получасть премия. Теке марто, Филякай, минек совхозось саизе буксирс «Красноглинкань» совхозонть...
Эщо бишь, совхозонтень панжинек робочей городок. Эрсить кинот, постановкат. Ней робочейтне оймсить тесэ культурнасто, аволь кода седикеле — олго потсо. Ули школанок. Робочеень пакшатне тонавтнить. Филякай, течи эли валске листяно видеме. Машинанок ды сбруенек анокт. Колхозов лездамо кучинек кавто бригадат.
Вадрясто роботы тонть пурнавт изобретателень куракшось. Гришин умок уш минек ёно. Музеус марто тейсть истямо машина, кона ськамонзо путы зяро модарькат, зняро путыть секе жо шкастонть ведьгемень ломонть. Сень кис макссть тенст премия...
Надиян, што «Правдасто» неик СССР-энь ЦИК-енть постановлениянзо, тонеть орденэнь максомадо.
55
