Вал-кавто Яблоновскойде ды сонзэ сворадонть. Котонест сынст судизь. Макссть тенст кемень иеть. Яблоновский ульнесь икелень пек сюпав помещик. Кромой кладовщикесь ды алашань кардазонь заведующиесь ульнесть пек сюпав торговецт. Щукин украинасто, Головкин Самарсто сюпавт... Тихондравонь директоронть ёртызь партиясто секс, што сон содась эйстэст ды кашт мольсь.
Учотано эйсэст директоркс. Больше а мезде сёрмадомс. Поздоровт кучить: Абрахимин, Морозов, дядя Костя ды Нарчук.
Тонть Катя ды Ким.»
— Катя ды Ким, — одов ёвтынзе Филя ды тусь занятияв.
ТОЛ ИВАН
I
Дойда прок пирявсь ульцянтень, а ков тензэ молемс. Ванкшны кавто ёнов. Прок талакадсь.
— Егор Максимыч, мезть ваннат? — сергедсь ульцянть омбоце ёндо Данчань Дрига.
— Вана ков бу молемс. Сак тей, кортатано...
Ёгор а мельсэ ютась ульцянть трокс.
— Исяк совинь Алякань Федянень, Иван лелязо прок бука пары каштом лангсо, моравты. Моравты-моравты — рукш, сельги.
— А истяк меритькак тензэ Тол Федя. Сонсь кудосо? — кевкстизе Дрига Дойдань. Федянень лиякс велесэ мерить эщо Варма.
56
