мсо кадрань секторонь заведующейкс. Ломанесь вадря, кортыця, пачк пейдезь ладсо ваны ломаненть лангс, прок мерят кежензэяк а эрсить.
«Эх, мон эзинь тонавтне сёрмас, мон бу невтевлинь, косо тельня эрить ракатне». Мейсь ёвтынзе не валтнэнь Филя, сонськак а соды.
Столенть экшстэ тейтересь чиремтизе прянзо, прок пелезь, салава ваны Филя лангс. Филя, прок лаки котёлсо, верев-алав кепсеви. Глушков варштась Филя ёнов, вановтозо истямо жо чевте, кода крайкомсо Соинэнть, ансяк эзь пеедть Соин ладсо. Тейтересь конштась керш сельмсэнзэ Глушковнэнь, Глушков комась столенть вельксэс. Филя пейсэнзэ чикордсь, мекс тейтересь кортни Глушков марто. Глушков пейдезевсь ды тусь тейтеренть вакссто.
— Вот он, председатель, — пшкадсь тейтересь. «Тывтырк» мольсть сельмензэ. Те цитнемась кирвастсь пси тол Филянь потс. Филя арсесь мадстемензэ толонть, сон седеяк теевсь потмозонзо натой а кирдевемашкакс.
— Как твой имя? — кевкстизе Филя тейтеренть лемензэ.
Тейтересь пейдезевсь, истя жо жарс каятотсь, седеяк якстерьгадсь чамазо.
— Мейсь тонеть? Катя монь лемем, — кармась кортамо эрзякс, ды сорновтынзе прясонзо кудрянзо. — Тон костонят?
Филянь кургось прок зоря. Ансяк кортыксэль мезть бути Катянень, се шкастонть ваксозост мольсь Глушков.
6
