— 9 —
Синди пача пэлькс, суски эздодонза весть, а лядыксть пуцы цепозонза, и сонць шарфцы прянц бокс, варчси кафта пэли — аф ваныхть ыли лангозонза. Тифтець бта вирь кучкас и моли такор кинява. Молсь-молсь, а кинэсь пефтома. Варжакць фталу-фталонза ащи кати мезэ понав. Сонць тракршка, а кургоц, кода тувоннэ.
Ваны Тюлэйнь лангс да низельгафнесыйнь пейнзон. Машць ёжоц Тюлэйнь, а понавсь паньжозэ кургонц ненгэ сяда келиста и шашць севмонза. Кургоц кода пэнокуд паньжада, а пейнза кода цянга пейхть нюрксть, оржа оржат, кода, салмокст.
Сельмэ озорканза Тюлэйнь машцть. Сельмостонза, кода толхт кармасть комотнема. А понавсь шашць сембэ сяда малозонза, келэптезэ кургонц ылэ-ни нильсы.
— Ой!.. ой!.. ой!.. — юваць мезэ прят Тюлэй и сргозсь
— Господи, — пшкэць салаванэ. Афлама ёткта мелэ моразевсть пецек-пецек атякшнэ. Лафчомс телац, кода эшлемода мелэ. Ваймоц арась вастозонза.
— Тэни аш мездэ пельмос: атякш морамода мелэ сэмбэ шэйтатнэ орьгоннихть, — арьсесь эсь пачканза Тюлэй. Киредезнь ненгэ сяда кемоста сембэ вастонзон и сиземать ланкс танга курокста матовсь.
Пиземсь пэцарфса цэерсь кутнонь лангс, и кати коса сувонць пинэ лефкскэ.
II
Кармась валдомма. Менельсь шистяма ширеста якстерьгоць, кода пси заслон. Модать алда курокста кеподезэ прянц шинэсь и жильфкасонза пиндолгофтознь шюжэрьса вельхтяф кутнень. Па-
