КЕЗЭРЕНЬ ПОБАСКИНЕ.
Эрясть-айшть атят бабат кавонест. Ульнесть сынст ве тейтерест ды ве цёраст. Атясь ды бабась сыретельть; тейтерьсь мирьденень максмошкаль; цёрась салдаткс туймешкаль. Ульнесь сынст видезь ве пельума сюрост.
Сась нуйме ланго. Атясь мери: „Мон нуйме а молян, — сыреян, тельня кулан, сюрот тень эрявмо а кармить”. Бабась-как мери: „Мон-гак а молян, — мон-гак сыреян — тельня кулан”. Тейтерьсь мери: „Мон-гак а молян нуйме, тельня туян мирьденень”. Цёрась мери: „Мон-гак а молян, — мон тельня салдатокс туян”. Конаст-как эзь мольть нуйме — кадовсь сюрост лов алов.
Сась теле, — атясь эзь куло, бабась-как эзь куло. Тейтерьсь мирьденень эзь тук, цёрась-как салдатокс эзь тук. Весе кадовсть кудос. Ярцамс тенст а мезде, сюрост апак нуйть лов алов кадовсь. Аштесть-аштесть вачо, сайсть койметь, тарваст ды тусть паксяв нуйме. Нардасть, нардасть ловсть эснэ — кельместь весе тоско.
КОДА ДУРАК САЛОНЬ РАМАМО ЯКАСЬ.
Эрясть айшть атят бабат кавонест. Ульнесь сынст ве цёрынест — дурацьке. Атясь прась ды кулось. Бабась калмизе. Пурнась бабась поминкат; дурацьке цёранть кучизе салонь рамамо.
— Азё, мери, цёрынем, батман сал рамак!
— Молян, — мери цёрынесь.
— Азё, ды ванок, иляк стувт, зняро рамамс! — тон кува молят, яла мерьть: батман, батман, ато стувцак!
Тусь дураксь, сонсь кува моли, „батман, батман!” мери.
18
