|
Вейке номеронть питнезэ 4 к. | |||||||||||||||||||||||||||||
 Еженедельный орган Мордовской секции при Ц. К. Р. К. П. (б.) |
|
| ||||||||||||||||||||||||||||
| № 27. | 7 сентября 1924 г. | № 27. |
| Эрзянь моkшонь тонафтыцятнень прумkсонтень. |
| Якстере Тештень редакциянь пельде привет. |
Минек, эрзятнэнь ды мокшотнэнь, пингизэст, весе историясост знярдояк ощо арасель тонафтыцятнень Всероссийской прумксост. Ней тынь васенцеде эрьва таркасто прумиде тев вейце, чтобу весеменень кортавомс тонафтума тевенть кувалт ды арафтомс те тевенть седе лац.
Минь весе лия нациятнеде кадовинек удалов. Эрзятнэнь ды мокшотнэнь лацо чопуда народ Союзной Республикаванть муят аламо. Ташто пингстэ, инязоронь правительствань шкане, эрзятнэнь ды мокшотнэнь лия мелка нациятнэнь марто теиксэлизь рузокс. Школава пакшатнэнь тонафтылть ачаркудевикс рузонь кельсэ. Эрзянь мокшонь велева школатнэнь эзга нарошна арафтылть рузонь учителть. Школасто лисесь пакшась берянсто тонадыль ловномо ды аламнеде содыль рузонь келенть. Парт, полезной знаният превезэнзэ акенерилтькак путомо. Знярдо властесь саевсь кадезэст робочейтнень ды сокицятненень, истямо руссификаторской политикантень путсть пе.
Советской властесь максь оля эрьва нациянтень школаваст тонафтомо эсист кельсэ, штобу седе курок весе удалов кадовозь нациятнэнь теемсь культурнойкс.
Ней тевесь, ялгат, кадовсь тынк мельга. „Якстере Тештень“ редакциясь кеми, што тынь тесэ парсте кортазь, вадрясто арцезь-думазь муйдядо ки, кода эрзятнэнь ды мокшотнэнь седе курок лифтемс валдо чис, арафтомс сынст самой культурной народ вакс и тееме эрзятнэнь и мокшотнэнь од пингень кис кеместэ ащицякс. Сестэ минь седе курок сатанок коммунизмас.
Покшт тевть, ялгат, ащить тынк икеле, но минь весе кемдянок, что тынь сынст тейсынк вадрясто.
Чумбра чи улезэ эрзянь мокшонь тонафтума тевсэ роботыцятненень!
| Рыков ялгась минек мастронть ланга истямо телеграмма кучць: |
 |
Кинь волосной сборзо эзь каявт сентябрянь первой чис, те сборонть сентябрянь первой чистэ пурнамодо лоткамс. Эзь пурнавт сборонть, ловномс недоимкакс.
Берянстэ эритнень лангсто недоимкаст совсем каинк, лиятнень пельде недоимкаст саинк сельско-хозяйственной налогонть марто.
Предсовнарком А. И. Рыков.
Рыков ялгань телеграмстонть неяви кинень эзь пандовт сентябрянь первой чис волосной сборзо, се ломаненть лангс, эзь пандовт сборонть, ловнусызь недоимкакс. Те недоимканть карми ломансь пандомонзо тедидень сельскохозяйственной налогонть марто иензэ пачк.
Эзь паневть волосной сборонть аволь весемень пельде сайсызь. Беряньстэ эритнень пельде сетненьдяк, а сасызь. Беднойстэ эрикс ловносызь конань ёмась посевзэ, конань кулость скотинанзо, конань кулость или еэриди роботниксэ.
Льгота максыть сеть семиятнененьдяк, конань ули ломанзэ красной армиясо.
Рыков ялгань телеграмзо сендяк мери: сентябрянь первой чиде мейле кодамояк налог, кинь пельдеяк, сайме акармить. Кармить сайме анцяк единый сельско-хозяйственный налог. Лия налогт, сентябрянь первой чистэ, кодаткак арасть, анцяк вейке — единый сельско-хозяйственный — коната невтезь ломаненть окладной листэнзэ лангсо.
Тедиде берянстэ эритне почти кодамаяк налог апандыть. Правительствась истя теи секс, штобу сынь сеть ярмакнесэ, конань пельдест а саить, витизь эрямо чист.
Т. Данилов.
| Эрзянь учителинь конференция Самарсо. |
Те конференциясь пурнавкшнось августунь 27 чистэ и прядовсь 29 чистэ. Молсь колмо чить. Сех ламо сакшность учительть Бугурусланской и Мелекесской уездасто.
Кода роботась те конференциясь? Роботазо молсь пек дружбасто. Весемень ульнесь превьсэ, что пурнавсть тейме покш тев, — кода-бу парынестэ витемс эрзянь тонафтомонь тевенть. Секс весе и роботасть лацто. Ламо кияк эзь споряк. Ды а мезе лангсо и спорямс. Весеменень неяви, кода тевсь ащи. Коли ащи сон, мерьмекс, беренстэ, то тесэ чумось аволь вейке или кафто ломать. И Самарской ялгатнэ пек правильна вачтасть тевенть лангс.
Главный вопроснэ ульнесть колмо. Первой вопросось ульнесь — доклад междун. и внутр. положениядо.
Омбоце вопросось — доклад, кода ней ащи эрзя ютксо просвещенской тевсь. Конференциясь тень кувалт мерсь, что минек Бюрось Наркомпроснэ линияст ведясь правильна. Коли сонзэ зярдо и аволь пек паро ульнесь роботазо, то тень эйсэ аволь сон чумо.
Конференциясь сермаць паро резолюция, конасонть ефтазь, мезе эряви теймекс, чтобу кепедемс седе парсте роботанть.
Колмоце вопросось — кода-эряви тонафтомс минек сельской училищасо, эряви-ли тонафтомс миньцинек кельне и коли эряви, то зяро иеть.
Конференциясь мерсь, что миньцинек кель эряви школас. Зяро иеть тонафтомс эрзянь кельне, ней кияк азды. Анцяк практика нефти, зярдо эряви кадмокс эрзянь келенть и кармамс тонафтомо рузунь кельце. Нилеце вопросось ульнесь эрзянь педтехникумдо. Минек аламо педтехникумнок, анцяк кафто и кафто отделеният.
Эрявить еще педтехникумт, ата учительнек арасть. Учительтеме жо эрзянь кель а ведяви школас. Педтехникумсэ эряви тонафлеме эрзянь история, этнография и поэзия.
Истя-жо конференциясь пуць, чтобу панжомс истят училищат, конатнэ-бу анукставолть ученикт педтехникумс. Ата ней сельской школасто пакшась а маштови примамс педтехникумс. Сонзэ знаниянзо аламо.
Истя-жо конференциясь пуць, чтобу сермадмокс ламине книгат миньцинек кельцэ. Весе ломатьнень, конатнэ маштыть сермадмо, саймекс учетс, теймекс мартуст связь. Эряви теймекс эрзянень вейке литературной кель. Истя-жо и мокшонень. Примерэкс саймекс се келеть, конасость сермадозь минек букварь — „Тундонь чи“.
Но конференциясь ульнесь доклад, кодамо косояк арасель. Те доклаць — эрзянь пионердэ. Самарцо ули эрзянь эйкакшунь кудо. Тосо эйкакшнэ теевсть пионерокс. Сынь тожо ульнесть конференциясо. Весемень туйсть мельц. И конференциясь пуць, чтобу ряц эрзянь школава кармамс тейме пионерт. Самарцо эйкакшонь кудонть теймекс опытно-показательнойкс.
Сех мееле конференциясь пурнась делегат Всероссийской Конференцияс и прядызе тевинзэ. Самарунь ялгатне тейсть эрзянь вечер, косо морасть эрзянь морот, ефлесть эрзянь стихотвореният, а пионерт нефлизь сынцист номерует (гимнастика).
Д. Желтов.
| Пензань губернянь эрьзянь-мокшонь тонафтыцянь прумкс. |
Августонь 14 чистэ Пензасо пурумкшнось губернянь эрьзянь-мокшонь тонафтыцянь конференция (прумкс).
Конференциянти пурумкшность котгемень тонафтыцят. Мольць сон вете чить. Ламо эрьва Мезень кортнемат конференциясонть ульнесть. Ламо покш вопрост (кевкснимат) решасть.
Весемеде ламо кортнесть не вопростнэнь кувалт:
1) Зняро иеть эряви тенек эсь школасонок эрьзянь-мокшонь кельсэ тонафтомс.
2) Кода весе эрзянь-мокшонь кортамотнень эстэ ве кортамо теемс, штобу эйсэнзэ кинигат ды газетт печатамс.
Васеньце вопросонть кувалт вана кодамо постановления тейсть:
Васень ступенень школасонть тонафтома тевесь ветямс эсь кельсонок, рузонь келень тонафтомась ушудомс колмоце иестэ.
Омбоце ступенень школасонть, знярц ощо арасть сонзэ коряс киниганок, тонафтома тевесь ветямс рузонь кельсэ. Эрьзянь-мокшонь кельсэ не школатнень эзга анцяк эрявить тонафтомс вана не наукатнень: 1) эсинек келесь, 2) эрзянь-мокшонь историясь ды 3) эрзянь-мокшонь этнографиясь.
Омбоце вопросонть кувалт лифцть вана кодамо постановления (путома): пурнамс седе курок пек вадрясто тонафтозь ломаньстэ комиссия, штобу сон весе эрзянь кортамотнень эйстэ теевель ве кель; истя-жо теевель мокшонь келенть кувалт как. Не кафто вопростнэнь кувалт меельцекс валонзо ефтасы Московонь эрзянь-мокшонь с‘ездась.
Конференциясь тевензэ ушудомадонзо икеле кучсь чумбра чинь ефтамонь телеграмм:
1) Тонафтома тевень пряньти — Луначарской ялганьти, 2) Сталин ялганти ды 3) ВЦИК-оньти.
Конференциясь ютась пек дружнасто.
М Кручинин.
