| 2 | ЯКСТЕРЕ ТЕШТЕ. | № 29 |
| Авань моро. |
Вай стяка, стяка, эрзень авине, |
Варштак валдо чис, чи лисима пелев, |
„Якстере Тештесь“ лангозост ваны, |
Кото год ютасть, кода власть саивсь, |
Уж умок тапазь бояронь властесь, |
Ташто шкастонть тон пильгало ульнить, |
Теле якшамне тон муськат-човат, |
Тунда мелявтат — ашо коцт кодат, |
Кизэ порасто пакся ки лангсат, |
Урядат-теят пакшат кирьгасот, |
Пингеть ютавсак сэкссэ-рудайсэ, |
Пандядо, ялгат, валдонть а содамс, |
Эряви, ялгат, сёрмас тонафнимс, |
Светсэнть месть тейнить весиде содамс, |
Вай стяка, стяка, эрзень авине, |
| Моронть ладизе сёрмас а содыця эрзя-ава Марфа Кочетова. |
|
|
| Учительтнень кувалма. |
Минь эрзянь учителень прумксцо Московсо кортынек весе эрзянь народонть тонафтумань кувалма, но вейкияк вал кияк эзь ёфта, кода тонафтумс учительтненьгак, чтобу сыньгак коть аламушкадо содавлизь политграмотанть.
Монь койсэ истя арцемс аэряви, кода арцить кой-конат учитель ялгатне. Сынь кортыть: „Минь истякак парсте тонафтоздяно. Миник лацо веси народось содавуль, пек паро уливель бу“.
Те виде, но вана политграмотанть кувалма прень кшнамо эрзянь учительтне иляст капша. Улить ютксост содыцят, ды аламо. Секс вана, кода минь кортатам народонь тонафтумань эйстэ, учительтнень аэряви явувтнимаст башка, буто сынь ламунь содыцят. Эряви тонафнимс весинень. Ведь учителентень эряви ашо пек ламо содамс, чтобу улимс истямокс, кода мерць теник Ленин ялгась.
Сон истя мерць: „Минек советской масторцо велень учителесь авуль анцяк пакшань (эйкакшонь) тонавтыця, кода ульнись революциянть икеле, улизэ сон общественной роботыцякскак“.
А коли улимс истямо роботникекс, эряви содамс политграмотантькак. Минь, эрзянь учительтне, газеткак а получатано, политграмотанть кедезэнеккак а сайнитяно. Газетань аловныцесь содазь, кодамо общественной роботникесь.
Арцеде, учитель ялгат. Вана сась сёксь, тыненк сави роботамс читальнясо, покшнэнь тонафтумо ловномо, а ведь покшонть малав пакша лацо вейке букварь марто а молят. Сон минек пельде местькак лият карми кевксниме. Сон кевкстяндат, кие Макдональдось, кодамо войнась Китайсэ, ды ламо кой мезде лиядо, например: крестьянской заемдо, а минь минцькак тень эйстэ аламот содатано. Чатьмуньмекс неть кевкстиматнень карчо аён, кияк кунцуломонокак а карми, азбукаскак сестэ миненек сынь а тонавтовить.
Ялгат! Давайте весе вийсэ седе курок тонафтомо политграмотанть, сестэ седе шождынестэ туи народонь тонафтума тевиськак.
Ловнодо ламине политической книгат, конатнень сайниде уононь библиотекасто питнень апак пант. Сёрмацтудо газет, ёфниде народнэнь, месть эйсэст сёрмадозь. Роботадо ламине народонть ютксо, сестэ карматадо народнэнь вечкевме.
Шабалов.
| ЦЕРАТ-АВАТ! ЛОВНЫНК! |
Эрзень велева пек стака авань эрямозо. Пешксесэ аванть эйстэ кортамскак а месть.
Колияк арась сонендэ ютко шка. Сон роботы весе марто, кидияк а кадуви. Роботы кудусо, роботы паксясо. Остатка чить яки, эряволь бу ванстомкс сонциндэ пресь ды эйкакшуськак, эряволь бу таштамкс вий стака чачтума читненень — сон роботы. Весе семиясь соды, что а тече ванды авась чачты. А ваныть те лангс, озавсызь крандайс и гайсэ ускить сондо паксяв. Лиясто авась уж сэреде мик ды визди евтамо, усксызь паксяв вицтэ чачтумо.
Чачнить рудазов банясо, бабушка марто. Бабушкась цюци каруяк азды, стака чачтумсто коласы аванть.
Ней эрьва больницява улить акушеркат, питне сынь а саить. Коть тонць мольть больницяв, коть сондо тердик кудув. Арась — сынцькак а молить, акушеркантькак а терцизь. Жаль маряви алашесь пустас паньмекс кемгавтово-кеветее вальгий петь акушерка мельга. Алашесь седе эряви хозейкань коряс. Хозейканть скотинань таркаскак а пуцызь. Кода скотинанть учить вазыямодо эли вашиямодо, мельгандо якить, седе тантийстэ андыть, седе лембестэ симдить, седе чевтенестэ ацыть. Аванть лангс а ванытькак, сондо омбоце чистэ роботавсызь. Эряволь бу оймамкс тендэ недлешка, сон пели трокс кармить лангузондо ванмо остаткатне. Кинь чумондомкс, что колоньгемень иес авась бабинекс велявты?
Коли цератне превиить, коли сынь пешксесэ аваньть кис кармить заботямо ды вечкеме сэредця лацо? Коли сынь лоткить сондо остатка чис роботавтомондо ды стакасто кепсивтеме?
Несэнк — авась курук чачты, ардудо акушерка мельга, а чачтумодо мейле максудо тендэ оймамо.
Цёрат! Тыненк эряви хозейкатнень ванстумост. Чумбра авась чумбра эйкакш чачтыяк. Ленин ялгась мерць: „Чумбрат эйкакшнэ — цветкат, сынст эйсэ миник паро читне“.
Нечаева.
| Кода тень коряс арситядо, од ломать? |
Колмоце ие лиси миник „Якстере Тештесь". Ламо паро ки невсь сон эрзянь ломаннень, ламо паро тевде кортась. Евтни сон велень эрямодо, евтни парсте хозяйствань втямодо, кода ламо сюро саемс и вачодо а ящимс. Эзь кадов буто ве уголнэяк эрзянь эрямосто, козой сон аволь тока.
Аламо мон некшнень „Якстере Тештестэ“ сёрмадумат эрзянь од ломанень эрямодо. Буто минек од ломатне арастькак.
Косто велесэ икелевгак заводи эрямось? Од ломатнень ютксто. Велень од ломатне — васинь цянавт, конат появасть ташто, наксадо, эрямонть велькссэ и ливтит паро эрямоньтень — социализмантень ды коммунизмантень. Эрьва таркасто ней марят — максудо ки од ломаннень!
Од ломатне кундасть неть валтнэнень и молить икелев. Кода молить? Мезе те молимантень меше? Кода седе бойкасто молемс? Месть тень коряс арсимс? Теде аламо кортыть. Эрьва тевесь парсти карми молеме и теевеме сестэ, кода эйстэнзэ кармить кортамо ламо ломать — коллективна. А эрзянь од ломатнень ютксо робутамодо ламо можна кортамс. Ламо мешицят улить те тевеньтень, А мекс од ломатненень а сермадомс эсь эрямодост-роботамодост? Мекс эсь тевдест а кортамс?
Стива комсомолец.
| Толконь содыть. |
| (Ташто-Дема веле Сарат. губ.). |
Веле кунчкасо, а марявма таркасо, кортнесть кавто бабинеть.
— Марить, кума?
— Мезе?
— Буто Семайкинунь Фирсань Васька калмусто лисне. Яки хозейканстэнь, ярцамо веши. Сондо калмизь поптомо, апак поминак. Сон ведь коммунист, тона чисэ а примить эйсындэ.
— Тевись истя улияк, кума. Оно манашкатне мереть — пизимеськак арась сондо кувалма. Антихристэкс калмазь. Коммунистнэ сынць кандызь калму лангс флаг марто, моразь. Мейле мольцть салава толконь содыцят, калмондо пачк пельсть варя ды каесть ведь калмунть поц. Теде мейле пизимнеяк пургась.
— Види валот, кума, види. Толконь соды ломатне мереть, таргамс эряволь бу сон тосто ды болотас калмамс, сестэ туивель бу покш пизиме.
Маресть тоде Васькань кавто ялгандо. Мольсть калмунть варчамо. Ваныть — памятникесь весе узирцэ керцезь, советской тештесь лазнузь. Калмунть ваксоль се палкаськак, конань эйсэ варенть пелезь. Палканть ды лазнух тештенть сеть ялгатне кандызь председательнень нефтемс.
Муимс бу неть толконь соды ломатнень ды нефтеос, костм* тукшны пизимесь, калмусто эли лия таркасто.
П. К.
| Стувтовить лемест — а стувтовить тевест. |
Казаконь велесэ, сёвонень карцо ащесть пекстазь сядо комсь ломань полонязь красноармеецт. Аволь куваць конанень-конанень кадовсь эрямс. Курок евтыть, кие кадови эрямо, кинень течи чокшне куломс веле ушос латкс. Чинек венек кардонть эйсэ ванстасть казак ружия марто. Оргадемс ульнесь а кода. Течи остаткадо кевкснить эйсэст, кие мезекс ульнесь ды кода эресь велесэ. Севть мекес кадовсь Микшов Вася. Курмушкаць саразокс сон уголнэс. Палозь палы седеезэ... Курок сайсызь сонзэяк.
Кавто казак ветизь Васянь генералонтень, кона кевкснесь весекень эйсэ. Месть эзь манче Вася генералонтень! Евтнесь, кода сонзэ тетязо эри сюпавсто. Сюдось коммунистнэнь эйсэ — пек обежить эрикснэнь. Генералось кевкстизе, зняро ульнесь модаст. Вете сядо десятина ёвтась сон. Те моданть ланга сынь, тетят-церат, ваньсть велень стадат, ней евтызе эсист модакс. Аволь берянь улемс истямо сюпавкс, арсесь Вася. Эризе сон весе пингензэ ревень-скалонь ванозь. Тусть генералонть мельс Васянь валонзо, мик пейдезевсь, мезе бути тешкстась конев ланкс. Куваць Вася вансь конёвонть ланкс, косо сёрмадозь весекень лемтне. Сонзэ лемезэ сёрмадозь севть песэ. Васянень неявсь, кода генералось сёрмаць сонзэ лемензэ карчо „оправдан“. Радувазь лисць. Кавто казак мекев ветизь. Анцяк течи фатясь Вася тундонтень, кода сынст пекстызь, ульнесь лов.
Ней лембе. Ульцява чийнить пакшат (эйкакшт). Лець мелезэнзэ кудось. Содыть а содыть кудосо сонзэ эйстэ? Марясь эзь авазо? Чикоргаць кардо кенкшесь. Таго мекев те чопуда кардонтень. Весе кашт молить ялганзо, теке пеле вять калмо ланксо. Сядо комсь ломань тесэ учить кулома. Весекень превсэ анцяк теке. Весек одт, анцяк эрямс бу. А куш а каш, анцяк седейтне чавить. Конань конань курок лотки, чавумадо. Кулозь лацо нейк уш аштить. Весенень евтыксыль Вася, кода сонзэ лемензэ карчо генералось сёрмаць „оправдан“. Сон карми эрямо валскеяк, ды вандыде мейлеяк. Ламо иеть сон еще эри. Эзь пшкать, — стака пшкадемс. Кияк а марятанзат. Весекнэнь стака. Пекстазь кандолаз лацо неяви кардось. Ряц аштить пельс кулозь лацо ломатне. Весекень вейке, эрямс эли куломс латксо веле ушосо.
Вася муизе тарканзо, косо алксокс — модась, прялксокс — модась, вельтямксос — лато прясь.
— Ну кода тонь? — Кевкстизе Васянь ваксцонзо ялгазо, Кальдин.
— Мон кадован... Аволь пек кежейстэ кевкснесь эйсэнь генералось... Лемемь коряс сермаць „оправдать“ — радувась кортамо Вася.
— Тон бу моньгак вановлик... Эх, моньденьгак бу истя сермадоволь... Кудов бу молевлинь... — стакасто укстазевсь Кальдин.
— Монь эзик ней, мезе сёрмадозь? — пшкаць Панкратов, омбоце ялгазо. — Пек уш пижнесь лангозон... Монь ледсамизь... Эрямс бу знярскак... Мейс мон сынь тюреме... Каднымизь — эзинь кадовт — мурнесь эсь прянзо Панкратов.
— Вася, кода тонь койсэ: тона чись ули-арась? — серовно сыре ава, конань ламо берянь тевензэ, кармась кевкснеме Кальдин...
— Монь койсэ — ули. Кулат, оймесь карми ливтнеме менельга... Кудов моли... Анцяк а нейсызь.
— Ойме!.. Кулат — мезеяк а кадуви — кармась пейдеме Панкратов. — Мень теть ойме... Сэвтядызь сукст!.. Эрямс бу знярцкак... Пандовлинь кежень. Генералонть пачалго ланксо пидевлия...
— Тон седе састо, марятадызь — пшкаць Вася.
— А мейсь пелемс ней! Яла теке монь машцамизь... Содавлиньдеря генералонть куркс сельгевлинь... Пек пижнесь... Улевель мезень кис куломс... Ней нать яла теке. Эзинек машт эрямо, — куломояк а маштано... Оргодемс бу...
— Састо, иля пижне!
— Кода кармить ледеме ветямонок — оргодян... Менян — паро, а менян — яла теке. А ваномс куш, кода лангозот ледить.
Лоткась кортамодо Панкратов. Оргодемась кеместэ озась превезензэ. Кеме сон ульнесь ломанесь.
— Мекс мон эзинь куло кудосо, кода сэрединь тифсэ — аварць Кальдин...
Аламот марцевить истят вайгельть, коданя аварць сон. Буто стенаванть мезе як кузи — а кузеви, пры мекев — таго кузи, таго пры. Мезе бути лисевель те сёвонь мешокстонть — а лисиви. Весе кардось пешкець апаром духсо. Кармасть ламо авардеме. Весе шатазевсть. Лаказь лакамо кармась кардо потмось...
Чопотець... Кармась экшеньдеме... Ушосо марявить вайгельть. Парыть скалт-реветь. Валгит стадат. Кармасть чавомо баяганть. Авардезь увныть баягань вайгельтне, ков бути ливтить. Кенкш варява меньсть валдо срулият чистэнть, кона курок валги. Эрьва чокшне те валдонтень радувильть. Ней кияк эзь радува.
Чопулгаць... А марявить вайгельть. Те вянть кинень-кинень куломс. А эря-
