ಮಾಮಲ್ಲ ಸಾಹಿತ್ಯ ಕ್ಷೇತ್ರ ಆದ್ ಬೊಲೆದ್‌ಂಡ್, ಬೊಲೆವೊಂದುಂಡು. ಪಿರಾಕ್‌ಡ್ದ್ ಬತ್ತಿನ ಜೋಕ್ಲೆನ ಜನಪದ ಸಾಹಿತ್ಯದ ಒಟ್ಟುಗು ತುಳು ಸಾಹಿತಿಲು ರಚನೆ ಮಲ್ತಿನ ಜೋಕ್ಲೆ ಸಾಹಿತ್ಯ ಪುಸ್ತಕ ರೂಪೊಡ್ ಪ್ರಕಟ ಆತ್‌ಂಡ್. ಐಟ್‌ಲ ಜೋಕ್ಲೆ ಪದೊಕ್ಲೆನ ಸಂಕ್ಷಿಪ್ತ ಚರಿತ್ರೆನ್ ಈ ಸಂದರ್ಬೊಡು ನಮ ತೆರಿಯುನ ಅಗತ್ಯ ಉಂಡು. ಒಡಿಪುದ ಎಸ್.ಯು. ಪಣಿಯಾಡಿದಾರೆನ “ತುಳು ಸಾಹಿತ್ಯ ಮಾಲೆ”ಡ್ ಪ್ರಕಟವಾಯಿನ ಕೆ.ಬಿ. ನಾರಾಯಣ ಶೆಟ್ಟಿ ಕಿಲ್ಲೆರೆನ ಕಾನಿಗೆ (೧೯೩೨) ಕಬಿತೆದ ಸಂಕಲನೊಡು ನಾಲ್ ಕಬಿತೆ-ಜೋಕುಲೆಪದ, ಪುರುಬಾಲೆ, ವಾರ, ಬೊಕ್ಕ ತಿಂಗೊಲುಜೋಕ್ಲೆ ಪದೊಕ್ಲೆನ ಸಾಲ್‌ಗ್ ಸೇರುಂಡು. “ಜೋಕುಲೆ ಪದ”-ತೊಟ್ಟಿಲು ತೂಂಕುನ ಅಪ್ಪೆ ಅಜ್ಜಿನಕ್ಲು ಪಣ್ಪಿಲೆಕ್ಕ ಉಂಡು. ಅಂಚನೆ “ಪುರುಬಾಲೆ” ಪದ, ಬುಲ್ಪುನ ಬಾಲೆನ್ ಮಂಗಟಾವುನ, ಪಕ್ಕಿ ಪ್ರಾಣಿಲೆನ್ ತೋಜಾದ್ ಕುಷಿಮಲ್ಪುನ ರೀತಿಡ್ ವರ್ಣನಾತ್ಮಕ ಆದುಂಡು. ವಾರ ಬೊಕ್ಕ ತಿಂಗೊಲು ಪದ ಏಳ್ ವಾರ ಬೊಕ್ಕ ಪದ್ರಾಡ್ ತಿಂಗೊಲುದ ಪುದರ್ನ್ ಪದದ ರೂಪೊಡು ಬರ್ಪಿಲೆಕ್ಕ, ಜೋಕುಲು ಪದ ಪನೊಂದು ಕಲ್ಪೆರಗ್ ರಚನೆ ಮಲ್ತಿಲೆಕ್ಕ ಉಂಡು. ಆಂಡ ಇಂಚಿತ್ತಿ ಪದೊಕ್ಲೆನ್ ಬರೇನಕ್ಲು ಆ ಕಾಲೊಡ್ ಕಮ್ಮಿ. ಮಂಗಳೂರು ಆಕಾಶವಾಣಿ ಬರೊಡ್ದುಂಬು ತುಳುನಾಟಕೊಡು ಬೆನ್ನಿ ಬೆನ್ತಿನ ಕೆಮ್ತೂರು ದೊಡ್ಡಣ್ಣ ಶೆಟ್ರ್ “ತುಳುನಾಡ್ದ ಮಲ್ಲಿಗೆ” “ತುಳು ನಾಟಕೊದ ತುಂಡು ಪದೊಕ್ಲು” “ಕರ್ಲ್‌ದ ಮೋಕೆ ಮದಪಡೆ ಜೋಕೆ”, ಅಂಚನೆ ತುಳು ಬಜನೆ ತುಳು ಯಕ್ಷಗಾನಾಂದ್ ಪಂಡದ್ ಪದ್ರಾಡ್ ಬೂಕುಲೆನ್ ಪ್ರಕಟ ಮಲ್ದೆರ್. ಆ ಕಾಲೊಡ್ (೨೦ನೇ ಶತಮಾನೊದ ಮಧ್ಯ ಭಾಗ) ತುಳು ಜೋಕ್ಲೆನ ಬಾಯಿಡ್ ಕೆಮ್ತೂರುದಾರೆನ ನಾಟಕೊದ ಪದೊಕ್ಲು ಬಾರಿ ಪ್ರಚಾರೊಡಿತ್ತ್ಂಡ್. “ಮಾಮಿಲ್ಲದ ತಮ್ಮನ ಬಾರಿಕಮ್ಮೆನ” ಇಂಚಿತ್ತಿ ತಮಾಷೆದ ಪದೊಕ್ಲೆನ್ ಎಂಕ್ಲೆನ ಜೋಕ್ಲಾಟಿಕೆಡ್ ಪಣೊಂದಿತ್ತ (೧೯೫೦ ಡ್ದ್ ೧೯೬೫). ಆಂಡ ಜೋಕ್ಲೆ ಪಣ್ಪಿಲೆಕ್ಕ ರಚನೆ ಮಲ್ದಿನ ಜೋಕುಲೆ ಪದೊಕ್ಲೆನ್ ಬರೆಪಿನ ಸಾಹಿತ್ಯೊಲು ಮಂಗ್ಲೂರು ಆಕಾಶವಾಣಿ ಶುರುವಾಯಿ ಬೊಕ್ಕ ರಚನೆ ಆಂಡ್. ಜೋಕ್ಲೆಗ್ ತುಳುತ ತಿರ್ಲ್ ಪೊರ್ಲು ತೆರಿದ್ ಆಸಕ್ತಿ ಪುಟ್ಟುಲೆಕ್ಕ, ಜೋಕ್ಲೆನ ಅನುಭವೊಗು ಬರ್ಪಿಲೆಕ್ಕ, ಜೋಕುಲೇ ಪಂಡ್‌ದ್ ಕುಷಿ ಪಡೆಪಿಲೆಕ್ಕ. ಬರೆತಿನ ಪೊಸ ಪರಂಪರೆ ಶುರುವಾಂಡ್‌ಂದ್ ಪಣೊಲಿ. ಹಿರಿಯ ಸಾಹಿತಿ ಕಯ್ಯಾರೆರ್ ಬರೆತಿಲೆಕ್ಕ - “ಆರ್ (ಕನರಾಡಿ ವಾದಿರಾಜ ಭಟ್) ಪದ್ಯಲ ಬರೆತೆರ್‌ಂದ್ ಸುಮಾರ್ ರಡ್ಡ್ ವರ್ಸೊಡ್ದ್ ದುಂಬು (೧೯೮೭) ಪ್ರಕಟ ಮಲ್ತಿನ “ಜೋಕ್ಲೆ ಪದೊಕ್ಲು” ಓದುದು ತೆರಿಂಡ್. ಬಹುಶ: ತುಳು ಬಾಸೆಡ್ ಜೋಕ್ಲೆ ಪದೊಕ್ಲೆನ್ ಬರೆಯೆರೆ ಸುರುಮಲ್ತಿನಕ್ಲೆಡ್ ಅರೆ ದುಂಬುದಾರ್‌ಂದ್ ತೋಜುಂಡು”-ಕಯ್ಯಾರ ಕಿಜ್ಞಣ್ಣ ರೈ (ಪೆರಡಾಲ ೭-೧-೧೯೮೯, ದುಂಬುದ ಪಾತೆರೊ-ಜೀವನ ಪಾರ್ಡ್ದನ-ಕನರಾಡಿ ವಾದಿರಾಜ ಭಟ್). ಮಂಗಳೂರು ಆಕಾಶವಾಣಿಡ್ ಜೋಕುಲೆ ಕಾರ್ಯಕ್ರಮ ಕೊರ‍್ರೆಗ್ ದಿಂಜ ಕವಿಕುಲು ಪದ, ನಾಟಕ, ಬಾಷಣ, ಪಾತೆರೆಕತೆ, (ಸಂಭಾಷಣೆ) ಮಾತಾ ರಚನೆ ಮಲ್ತೆರ್. ಐಟ್ ಏರ‍್ನ ಪುದಾರ್‌ನ್ಲ ಪಣಂದೆ ಮಾತೆರೆಗ್ ಸೊಲ್ಮೆ ಸಂದೊಡಾಯಿನ. ಆಂಡ ಪೆರೂರು ಜಾರು ಮೆರೆನ “ಜೋಕುಲೆ ರಾಗೊಲು” ಬೊಕ್ಕ ಕರ್ನಾಟಕ ತುಳು ಅಕಾಡೆಮಿ ಪ್ರಕಟ ಮಲ್ತಿನ ಶ್ರೀಮತಿ ಶಕುಂತಲಾ ಭಟ್ ಹಳೆಯಂಗಡಿ ಮೆರೆನ “ಪುರುಬಾಲೆ” – ರಡ್ಡ್ ಬೂಕುಲು ನಮ್ಮ ಗಮನೊಗು ಬೈದ್‌ಂಡ್. ಬೇತೆ ಜೋಕ್ಲೆ ಪದೊಕ್ಲು ಪುಸ್ತಕರೂಪೊಡು ಪ್ರಕಟ ಆದಿತ್ತ್ಂಡ ಅವೆನ್ ಗೌರವಪೂರ್ವಕ ನೆನಪು ಮಲ್ತೊನುವೆ. ಜೋಕುಲೆ ಪದೊಕ್ಲೆಡ್ ಮಲ್ಲ ಕ್ರಾಂತಿ ಮಲ್ತಿನಕುಲು ಪನ್ನಗ ಬೆಂಗಳೂರುದ “ತುಳುವೆರೆ ಚಾವಡಿ”ದ ತುಳುವೆರ್. ೨-೩ ವರ್ಸೊಡ್ದಿಂಚಿ ಕೋವಿಡ್ ಮಾರಿ ಪರಡೊಂದಿಪ್ನಗ, ಇನಿತ ಕಾಲೊಡು ತುಳುಬಾಸೆ ದುಂಬುಗು ಒರಿದ್ ಬುಲೆವೆರೆ ಸಮರ್ಪಕವಾಯಿನ ಆಲೋಚನೆ ಮಲ್ತಿನಕುಲು ತುಳುವೆರೆ ಚಾವಡಿದ ತುಳುವೆರ್. ತುಳುತ ಪೊರ್ಲು ತಿರ್ಲ್ ತೆರಿದ್, ನಿಜವಾಯಿನ ಆಸಕ್ತಿ ಅಭಿಮಾನ ಪುಟ್ಟೊಡಾಯಿನ ತುಳು ಜೋಕುಲೆ ಉಜ್ಜಾಲ್
v
