— 6 —
ZABELLE.Més infin, ch’n'est pos pou ein pauf quart de franc d’ puque par jour que l’zouverriers i' d'mand’tent, qu'ces richards s’reottent obligés d'aller à l’ameône si i' leu donn’reottent !...
Neon, bin sûr, cha n’ s'reot pos cha qui les ruenn'reot; més v'là, i' veuttent faire vir qui seont les pus forts.
Cha n'impêche pos qu’ nous seommes les prumiers à pâtir !
Ch'est bin la pure vérité.
Nous auv'là ichi comme des vrais minables: sans pain, sans feu, sans ein double !... Et pus d’ crédit à avoir nulle vart !...
L'boulinger m'a dit qu'on li d'veot d'jà treop d'argint et qu'i' n'donn'reot pus rien sans liards.
Quoi c’ que nous alleons dev’nir, de, béonne saine Vierche !... À c’ matin j'ai dû inveyer l’pétit Bébert à l'école, sans d'jûner.
I' a pou ête désespéré à toudis !
Et t' père qui n'ervient pos !... I’ est allé vir pou tâcher d' trouver eine paire de francs à prêter et j' tranne in pinsant qu'on areot pu l'ratinte !... Tins, j' sus désolée assez pou faire ein queop d’ malheur!
(Elle prind s’ tiète à deux mains).
Prennez corache, allez, mamère,
Te veos, fille, quoi c'qui arrife dins les maseons d'ouverriers quand on fet grêve !... Acoute, l'infant, je n' te s’haite pos d’ passer par ein infer ainsin quand t’ s’ras mariée !...
