nakekeraan nin panayam ko diad sayan bansá tan agko la labay so migotgotan ed lalakín akasapey. Sakey ni akabatan ko ya say Provincial(1) da niludlorey toy ganggan ko; kinerew kon dusaen to tan a pári a yalis tod kawalaan ton báley; tua ta inalis to, balet ta inakar tod báley a mas maong. Silib day papári, ya singa kuan tayo ed España!"
Balet ta nen bukbukor to la, binminta.
"No ag say inkamureng tonian bansá, yabin ko rayan papári!" kuanton nginmeswá. "Antoy nagawa, kapag sakey a bansá kanepegan toy kapalaran to, kanian mas maong lay milad ágos.'
Ipawil tayod Kápitan Tiago ya asumpalan akitungtong ed pári Dámaso onó ayari lay pári Dámason akisalitad sikato.
"Amtam la, a!" kuanen pári nen onsipot. "Ag laya komon asabí no impanon mod siak, ya agmo ak tinilaan nen tetepeten ko. Ag kala manlolokolokoan tan ipatron mod padrino to."
Si Kápitan Tiago liber a liber dimad salas a sinonunot tan manngesway ankakabaleg. Kasanlilikna singa walay anunotan ton makapaabig, batik dimad silir a dasalan tan ineerep ton masigsiglat iramay sinelselan a kandila tan lamparaan ya impaselselan ton dildili pian nilaban ed kaatapan si Ibarra.
"Wala ni tiempo ta andukedukey so dalan!" kuanton inmeremeré.
(1) Say manonaan a makauley na sakey a Togiop day Papári.
