en so kakaagos to. Dimad bandad aragdawi walay sakey ya alulong ya inpasen ed tamtambib na danum, a singa to tatagamen so katagian, a no nengnengnengey mayumis iran lusek to singa alimbawa toy sakey ya ayep ya andudukey so salí to ra, ya sisiimen to tan tatalaranan toy pakasingkat tod samay uleg. Wala ray sengeg na niog ono sengeg na kiew ya ag nira inukisan a manyugás iran kibangkibang, ya anekep ed biek tan biek a pangdel, tan anggaman ontan lay kapoy dan taytay, balibali ra balet a panagsirkoan. Saray ugugaw a manaames dimad ilog, panelelekan day takut tan pága ray bibiin ontutonton a sankaagto ray buksot, odino say panggiwgiw daray mamasiken a napakpaktak day tayukor dad danum.
Sa bálet so makatawag lawas na imano, say sakey a takel ya aliling toy melag a polo ed pegley ton man a maawang, malinis tan dinalusan a kaumaan. Diman ira nanengneng so kiew iran matatatken tan ankakabaleg, a longogan laray sengeg da, ya ompatey ira labat no terakan iray karol tan napoulan ira, tan kuanda ta say apuy ag onkakayat no agta naerep lad man; wadman met iray ankakabaleg a bató ya akubotkubotan iray pakopakó tan masilesileng a lamuyak. Say dabok a natipon a mantatapewan ed kutkotlaong daran man a bató, paawetey uran tan dimay tutuboan day bukebukel ya awit daray mantekiab a mánok. Anggapoy makakaamper na ibobona ray tamtanaman; saray masabit, saray wakawakal a nankakawetan a singa dara tinekeptekep so kakiyewan, akamalagaygay irad sangasanga tan binmalbaliber iran pinmepeket ya anggad lamolamot ono kinmokurong irad dálin; tan singa bilang kulang niya nen Flora,(1) wala nira lamet so tamtanaman a tinmotubod binmibisal a sinmasangin ubak na sengesengeg day kakíyewan, pakopakó, oong, tan arum niran tanaman a mararakep so rosas da, ya aliling day wadman ya akitonda ya agla nibiig so sangasanga ra ed sanga ranmay nagtúloyan daran kakiyewan.
Anggapoy mandidiwit ed saman a takel: dakerakel so tongtungtong a nipaakar ed sikato, et say sankana-
(1) Diosa na primavera, panson a panagbulong tan panagrosas day ámin a tamtanaman.
