Akigtot imay iba to.
“Abuyak imay longon, midio akapaway imay inatey, ambanget.... insan mo sakbaten .... mapmaples so uran, apuyot kamin dua .... insan ....
“Krr! Akin et kinotkot mo ey?”
Minengneng nen sepulturiro ya singa mankelaw.
“Altin? Amtak pa lagi? Ingganggan da ak!” “Siopay angiganggan?”
Akasuner imay sepulturiro tan ninengneng ton pinatagey, pinalepsab imay iba to.
“Ay said! singa ka kastila; ontan iran petepeteg so tinetepet ton may sakey a kastila ed siak, balet ta diad maamot. Ebatan takay singa inebat kod samay kastila: ingganggan ak nen parin baleg.”
“Ah! Insan, antoy ginawam ed samay bankay ey?”
“Diablo! no agta ka labat kabat ya amtak a laki ka, ibagak lan tuatuan kastila ka: say pananepet mo petepeteg a pananepet ton may sakey. Nengneng mo. . . si parin baleg ingganggan to ak ya ikotkot kod kamposanto ray intsik, balet ta maniapod mapalaloy belat ton may longon insan arawrawi kamposantoy intsik. . . . .”
“Andila, andila! agko la mankotkot!” kuanton sinmalabat nimay sakey ya masiadoy takut to, inikbanan toy pala, tan linmokson pinmaway ed samay lubok; “akapisag ak na uld tan antakut ak ompano agto ak paugipen naani!”
Inarakak ton may sepulturiro nen kanengneng ton onaarawi lamay iba to ya kuros lan kuros.
Mankakalkalnan napapanoy kamposanto na lalaki tan bibii ya akabaliwan. Saray arum aanapen day pasen ya angikotkotay inatey da, mansusupiat ira, tan nen ag ira makapanpapakna nansisiyan ira ya sakey tan sakey tinmalimokor ed isisipen ton suston pasen; saray arum ya inpapantion iray inaatey da, nanseselsel laray kandila tan ginapoan dalay maraldalit a mandarasal; sankarengel met so panayay tan pansibek day arum ya wala lad tay popokpokan, wala met la balet so singa ipapangta. Ontan met ya dengdenglen so meremere na orapreo, orapreiss tan requiem aeternams.
Nitan lan tinmobong so sakey a masiken a melag a too tan mabilabilay iray mata to ya ag nansombriro.
