Nen ompapaway imay masiken sustosuston tinmondad wangalay dalan so sakey a luganan a nengneng toy arawi lapuan to ta akubotay dabok, tan naames irad linget so kabayo.
Inmepas si Ibarra ya manomtumbok so sakey a manaayam ed sikaton masiken. Insinyas tod luganan ya onia la insan amaarap ed kamposanto ya andi esel tan mabinbinta.
“Agak la akapawil, sinyor, ta nansakit ak insan akamayamay so trabajok!” kuanton may masiken a smga nasisikig; “insan inbaga di Kapitan Tiago ya sikara lay akauley a mamagaway pantion; balet ta tinaneman koy rosas imay lubok insan ininan koy krus a ginawak a dildili.”
Ag inmebat si Ibarra.
“Diman ed beneg ton may krus a baleg, sinyor!” kuanton intuloy nimay masiken ya inturo toy sakey a sukong nen kaloob dad pinto.
Diad inkakusokusoy nunot nen Ibarra agto naimanoy inkikelawan day arum a totoo nen abirbir da, ya tinmonda ran mandarasal tan pinakpaknuyotan day mata ya napno ray usisa.
Manaakar ya ipipilipili toy dadapoay sali to, tan gagaween toy anggaay nayarian to ed agto pakagatin ed saramay lubolubok a mapatpatnag ira ta nikundalem so tapew da. Nen saman tinataltalpakan to ra, natan balet gagalangen to ra ta wadman met si ama to ed nanparan kipapasen. Tinmonda ya lingawlingaw nen kasabi tod biek ton may krus a baleg. Samay iba to
