Akaimis imay sepulturiro.
“Andi lad tan imay inatey!” kuanton amagamaga.
“Antoy kuanyo?”
“On!” kuanto nin singa manusutil; “angikotkot ak lad tay bii nen simban sakey.”
“Ambagel kayo, amo?” kuanen masiken; “anta anggapo ni sakey taon ed impangiponpon mi!”
“On lanti! Pigapigay bulan lan kinotkot ko balet. Ginanggan ak nen parin Baleg a papayakar tod kamposanto ray intsik. Et maniapod ambelabelat insan uran ed saman a labi. . .
Agto nisumpal; akasuner ya ataktakot ed inpakanengneng toy itsura nen Crisostomo ya tinakbaan ton binenbenan ed taklay ya niyogayog.
“Ginawam a?” kuantod tonoy bosis ya ag nabaliksanan.
“Ag kayo mamapasnok, sinyor,” kuanton pinmoti lupa to tan manggiwgiw, “agko inkotkot ed kawalaan day intsik. Mas maong lay nalener nen say milaok ed saray intsik, kuankod siak a dili, tan inbontok kod danum !”
Intelmer nen Ibarray duaran poniti tod nantopag ya abala may sepulturiro, tan ninengneng ton abaybayag na ag nabaliksanan a kanenengneng.
“Sakey ka labat lan masegsegang!” kuanton inikbanan tan pinmaway ed kamposanton masigsiglat, a ginagatingatinan toray pukepukel, lubolubok tan krukrus a singa bilang naambagel ya agto amtay gagaween to.
Samay sepulturiro puyokpuyoken toray taklay ton nguronguro:
“Sa lanti gulon gaween day inaatey! Si parin Ba leg pinepekpek to ak na baston lapod pinaulian kon inponpon da ya anta agmakayari ak; insan sayay sakey natan ay dagdaiset a pinoter toray taklay ko lapod kinotkot ko. Saraya lanti kakastila! Maong lanti no agak ni naekal ed anapan ko!”
Masigsiglat so akar nen Ibarra ya arawrawi kawalaay mata to; samay ugaw ton masiken mannangis a manomtumbok.
Onseselek lay agew; makapal iran lurem so akasanib ed tawen ed bandad bukig. tan ambetebetel a dagem so mamapalasapas na toktok day kakiyewan tan ontan met a singa to ra paneyeyen so kakawayanan.
