Kinmirmat na maliwliwawa.
“Jesus, Marla tan Jose! Sta. Barbara bendita!”(1) kuanen Kapitan ya inmeremere ya pinmoti lupa to tan anguros.
Inbitaktak nen Tasio.
“Kanepnepegan yoy ngaray santan patrona yo,” kuantod salitay kastila, insan to imbeneg tan amaarap ed simbaan.
Wadman iray managpamisa ya ipapaalagey dad dalem na simbaan so sakey a tumba ya aliberliber na akamayamay iran kandila ya intuturek ed panangiturekan iran kiew. Say ikakana ra duaran lamisaan ya ankabaleg ya impantapewan tan kinubotay abel ya andeket a nanggulis na ampoti, ya pinintaan na indatdatak iran pukel na ulo.
“Anto ya, para saray kakamarerua ono para saray kandila?” kuanton tinepet.
Et nen anengneng toy duaran ugaw a lalaki ya mantaoy samplora may sakey tan pitoy taon imay iba to dinago to ra ya agto la inalagar so ebat daran may arum a managpamisa.
“Mila kayod siak, ugugaw?” kuay tepet to. “Intadiaan kinen ina yoy masamsamit a pandeman, singa kakanen day papari.”
“Ag kami bulosan nen sakristan mayor ya anggad a las ocho, Mama!” kuanton, inmebat nimay baleg. Ilaloan kon naalak so sueldok pian walay niiter kod kindi ina mi.”
“Ah! Iner so laen yo natan ey?”
“Diad tori, Mama, ta mantugtog kami para saray kakamarerua.”
“Onla kayod tori? Manlikas kayo, a? Agyora aasinggeray kampana no bagyo.”
Insan la pinmaway ed simbaan, balet ta pinaknuyotan to niray matan napnoy panangasi ramay duaran ugugaw ya onsesegep ed takayan a mamaarap ed koro.
Si Tasio nilirlir toray mata to, tinmangay ed tawen tan kuanton inesaes:
“Natan liknaen ko no wala ray onterak a karol.”
Tan amaarap lad paway na baley ya akaosdong tan
sinonunot.
___________
(1) Santa Barbara, patrona ed karol.
