sakey ed sikatayo kanepegan ya awaten toy upa ono
dusa ed saray gawa to, ya aliwan nisengeg ed gawa
ray arum.”
“Sananey so natepet ko, naitdan yoy misa may asawa yo, unong na asalitak ed sikayo karoman?” kuanen Donya Teodora ya sinalatan toy tungtongan.
“Andi!” kuay ebat nen masiken a makakaimis.
“Kawaen la a!” kuanen bii ya naermenan; “kuanda ta anggad nabuas na a las dies saray kakamareruad Purgatorio liberliber iran manaalagar na tulong day wala nid bilay; a say sakey a misa ed sarayan agew, kabaliksan toy anggano limara no arum iran panaon, ono anggano anemira ni ingen ya unong na kuanen kura natay kabuasan.”
“Ehe? no ontan sirin walay tinandaan a plaso ya nakaukolan a samboten?”
“Agay kala Doray!” kuanen Don Filipo ya sinmalabat. “Anta amtam lan ag manisiay Don Anastasio ed Purgatorio!”
“Akit agko manisia?” kuanen masiken a midio akaalagey ed yurongan to. “Amtak ni ingey gapo to.”
“Say gapoy Purgatorio?” kuanday sanasawan nikelawan. “Dali pa, tungtong yo pa sirin ed sikami!”
“Agyo manaya amta, insan iter kilan iter na misa tan sasalitaen yoy irap dad man? Dali! Onggapo lan lamang so uran insan singa nengneng toy mabayag ya ontonda, manongtong ak la ingen pian walay pamalabasan tayoy oras,” kuanen masiken Tasio ya singa mannonunot.
Inkopit nen Don Filipoy libron sankaegnaan to tan inyurong nen Doray ed abay to anggaman inyan to lad linawa toy agto sisiaen so anggan anton ibaga nen masiken Tasio. Saya inggapo ton nankuan.
“Say Purgatorio abayag lan wala, kasakbayay inkianak nen Katawan tin Jesukristo, tan unong ed kinen P. Astete walad kapegpegleyay mundo, odino diad kaliberliber na pasen a tatawagey Cluny unong ed inkuay sakey a pari ya sasalitaen nen P. Girad. Satay pasen anggapoy kabaliksan to. Natan sirin: Siopa ray nakakalot ed saraman ya apuy a mandardarlang laran nanlapod inkapalsay mundo ey? Say inkiwala ton abaybayag la patuaey Pilosopia kristiana ya ibabaga ton
