Manlaldak a mantotumbokan tan manaabotan so karol a tekep day makapataktakut iran kirmat a singa bilang say Dios et isusulat toy ngaran to na apuy tan manggiwgiw iray katawenan. Binakbinak so uran tan diad pangipapalir na mabiskeg a dagem a manngisiw na ontan lan makakebiew, biek tan biek so arap na danum. Ngalngalin ag narengel so tanol day kampana ya singaal day natatakut a mangipapaarap ed tawen na pikakasi ran napnoy ermen; no ontonday daiset so tanol na karol tan peles na uran tan dagem, narengel so maletey ya anyiweng na kampana ya singa pakaskasin tagleey.
Dimad tagey na tori wadman iramay duaran ugugaw ya anengneng tiran misasalita ed samay masiken a makabat. Samay yogtan, ya ugaw ya ankabaleg tan andeket iray mata to ya nanengneng ed lupa toy mabaing, ipitipit kalamor ed samay pangoloan to ya kalublubayan tod inkalupa, anggaman say kalilimgis ton may baleg et mas masekder tan nengneng to lay mas masulong. Dagdaan so kawes da ya napnoy sursi tan sakab. Akayurong irad sakey a puter na kiew, tan sakey tan sakey sankaegnaan toy lubir ya akaagoy a nanlapod mad ambilbilunget a tagey na tori. Say uran ya ipapalir na dagem nasasabi to ra, tan ipapalirpalir to met imay liwaway silew na kandilan akaterek ed sakey a baton baleg, a batd yan ikakanan ipapagalarogor dimad koro ya pangaalig day tanol na karol no mansirmoy pari no Viernes Santo.
“Bintol mo tay lubir mo, Crispin!” kuanton may pangoloan ed samay yogtan to.
Saya binitinan to may benbenbenan ton lubir, tan nangel dimad bandad tagey so makalnan tagleey ya
