sanlasus tan anemaplon kuarta. Ay ina! Pigara tay
sanlasus tan anemaplo ey?”
“Talomplo tan duan lima,” kuay ebat nen pangoloan.
Sankanengneng nen Crispin so ankekelag iran lima to.
“Talomplo tan duan lima!” kuanton inoman; “anemiran lima tan duaran garnet; insan kapag sakey a garnet, pisos .... Ay ina, agay lan karakel na kuarta. Agla nabilang ed taloy agew .... nayari lay manaliw na sinilas ya apis na sali, sombriro pian walay sanib na ulo no masiadoy petang na agew, payong a baleg ya ikana no uran, pambilay, kawes mo tan di ina tan . . . .”
Tinmonda ya nannodnunot.
“Agi, tinakew ko la komon!”
"Crispin!” kuanton amasnok imay pangoloan to. “Agka mamapasnok! Say kuanen kura ta pateyen da ak kono no ag ompaway itan a pilak; no tinakew ko komon nipaway ko . . . . insan no ompatey ak, walay kawesen yon dua di ina! Tinakew ko la komon!”
Ag inmesel si pangoloan tan binintol toy lubir. Insan kuanton inngeswa:
“Say kapagpagaan ko say pampasnokan daka di ina, no naamtaan da!”
“So pakaisip mo?” kuanen melag a nikelawan. “Ibagam a, ya pinairap da ak la, ipanengneng kod sikaray siregsireg na laman ko, tan bolsak ya apilat: saksakey ni naegnaan kon kuarta ya inter dan aginaldok nen Pasko, et inala nen kura karoman. Agak ni akanengneng na onman a dakep na kuarta! Ag nayarin manisia ra di ina, ag ira manisia!”
“No ibagad sikara nen kura ...."
Inggapo nen Crispin so akis tan manogaog a kuanto:
“Pawil kalan bukor sirin, agko la labay so ompawil; ibagam ed kindi ina ta agmakayari ak; agko la labay so ompawil!”
“Agka onaakis, Crispin,” kuanen pangoloan. “Ag ira tan manisia di ina, siala; say kuanen masiken Tasio man et inparaanan da itay maong a pandeman . . . .”
“Maong a pandeman! Agak ni angan .... agda ak labay a pakanen anggad ag ompaway imay duaran onza .... No manisia ra balet di ina ey? Akauley
kan mangibaga sirin a mantitila may sakristan mayor,
