tan pati si kura ya manisisiad sikato; tan mantitila ran amin; ya ibabaga ran matakew itayo ta lapod mabisio
ra di ama....”
Binmutay so sakey a ulod mad tagey na takayan a mamaarap ed leksab, tan saman yo ulo nen Medusa(1) pinaer toy salita ed bibil ton may ugaw. Sakey ya ulon pandukey, mabeng, ya andeket so buek ton bangol; tan akasalming na asul kanian adisimulay inkabulding to. Sikatoyay sakristan mayor tan onman a lanang so kasasabi to, ag nalikas, ag ompaamta.
Binmetel so sali tan lima ran may sanagi.
“Sika, Basilio, multaen takay binting ta agmo napetek so pananogtog moy kampana!” kuantod bosis ton araldalem. “Tan sika, Crispin, agka makaalis ed sayan labi anggad ag ompaway itay tinakew mo!”
Nilimgis nen Crispin si agi to ya singa papailaban.
“Wala lay abuloy mi ... . alagden da kami di ina na a las ocho,” kuanton makalna tan natatakut si Basilio.
“Sika, agka met makaalis na a las ocho; diad a las dies!”
“Anggapo la balet, mamay, makapanakarakar ed lansangan na a las nueve, insan arawrawi abong mi.”
“Say labay mo sirin sikay manggangan ed siak?” kuanton ampetang so ulo to. Insan binenbenan toy Crispin ed taklay ya igoguyor.
“Mama! sakey simba lan agmi nira anengneng di ina!” kuanen Basilio ya mikakasi tan binenbenan toy yogtan to ya singa to ilaban.
Si sakristan mayor pinitpitan ton sinegpay so lima nen Basilio insan to ginoyor si Crispin ya saya inian toy akis tan inlespak ton mankuan ed kuya to:
“Agmo ak tataynan ta pateyen da ak!”
Ag inasikaso nen sakristan no agta insagarsagar tod balitang na takayan ya anggad inpakasabi rad ambilunget ya ag lara nanengneng.
Ag akasel si Basilio. Dengdenglen toy tanol na
laman nen agi to ya manlaltog ed balitang na takayan;
kasanlilikna ampaipait ya akis, aminpigan palalpak, insan nankalkalnan manarawi raman ya makapasinagem
ya akis.
___________
(1) Diad mitologia odino awaran daray dioses tan saray bilay day uliran daray totoo nen inmonan panaon ya ag ira anisia ed saksakey a Dios, sayay medusa sakey ed taloran sanaagin bibii ya dinusa nen diosan Minerva ya inpanmaliw toray buek to ya uleg tan amin a makanengneng ed sikato manmaliw a bato.
