diad pilit to met ed pakaorong day anak tod eskuilaan
dimad baley pian makaaral iran manbasa tan mansulat,
intuloy toy kanunotan to. Si asawa to ag met inmesel.
Saman a labi ed oras angankon nanpegleyay las dies tan las onse nen mankidkidiam laray bitewen a maliwliwawa lay tawen ya awakasan ya aminpinsan na linmabas a bagyo, manyoryurong si Sisa ed bankon kiew a banbantayan ton sankannengneng so ondadalang a sangasangan ankelag tan balbalsig na kawayan a pinarlangan tod sakey ed saramay dalikan a nankokumpog a baton mabilay. Walan akatoon so bangan melag a panlolutoan toy belas tan dimad ngalab mankakaiot na taloran tinapa ya saramay sasaliwen na taloray sakey baleg.(1)
Akaampat dimad arap na dalikan a sankanengneng to may duyawduyaw tan makapkapoy a dalang na kawayan tan samay ngalab ton ontan lay gano ton ondadapol, akaimis na maerermen ta nanonunotan to may bonikew na banga tan apuy ya inpabitla nen Crispin ed sikaton aminsan:
Duduroen nen ambalanga,
Insan biglan binmurabura.Wala nid kalangueran, tan nanengneng ed sikaton diad inmona ran agew et maganggana tan malimgas. Saray mata to, ya singa met ugali tan walna ton impatawir tod saray anak to, marakerakep, andurukey so palatang da tan kanenengneng day araldalem; asimbang so eleng to tan balibali inkatabas day bibil to, anggaman amespesiaw lara natan. Sikatoy tatawagen day tagalog na kayumangging-kaligatan — ande ket balet ta mareret, a kuan ed Pangasinan. Et anggaman tua ta ugaw ni, sa lagi ermen ono diad kairapay bilay, singa ginmapo laran onkakapit so aping ton ames pesiaw ; say buek ton makapakapal a nen saman et balbaleg a parakep to, no mainsay nin anggad natan aliwan ates so makasengeg no ag say inkipasal: inalimpogo labat na yanoyano ya anggapon seldet ono akapaklar a pamarakep a sagaysay.
Pigay agew ya agla akaalis ed abong ta insamboton sinompal so imparait dad sikato. Diad panangaminawaen toy naalmoan to, agla akimisad saman a ka-
_________
(1) Duaran cintimos.
