“Narnarasan iran onsabi!” kuantod nunot to; “arawi akaren da insan say narasan aliwan mapili, anggano anto labay to.”
Wadman a tatalinengen toy anggan anton bengat lan tanol tan lilikasen to no walay manaakar: “no mabakabakat a malinlinew, si Basilio; no makalna ya ag aparijo, si Crispin,” kuantod inkasika ton dili.
Amidua ono amitlo lan kinmokaok so kalaw dimad kaabay a takel, balet ta andi niray anak to.
Inyan tod dalem na banga ramay tinapa pian ag ira nabetelan, insan linmad mad pintoy alulong a pakanengnengan toy dalan. Inggapo toy mangakantan makalkalna ya panaalagaran tod sikara. Marakep so bosis to ya mansinsintimiento, tan no dengdengelen day anak ton mangakantay kundiman makaterter so lua ran agda amtay pansengegan. Saman a labi balet singa manggiwgiw so bosis to tan singa manngirngiras so pananganta to.
Tinmunda, tan kinunineng toy akaliktob a kabilungetan. Anggapon balot so nanengneng tod banday maniapod baley, no ag bukor bengat nalikas toy onsisiplog a dagem ya ipepelag toray danum ya atiptipon ed bulobulong na ponti.
Kasanlilikna anengneng tod arap toy sakey ya aso ya andeket ya waiay sisingoben tod dalan. Si Sisa nisegawan, angalay bato tan tinupak to. Samay aso inyan toy kuyat a mantagtagloong.
Sikato aliwan mamali balet ta diad kinarakelay nangnangel to nipapaakar ed malimali tan saray ason andeket, ataktakot a maong. Inkapot ton magangganat so pinto tan inyurong tod mad abay na silew. No labi singa madmainomay so manigsisia, tan say dilin kanunotan maininomay ton panoey anyani so amin a sukong.
Sinali toy nandasal a tinmawag ed Virgen tan diad Katawan pian komon antabayen daray anak to, lalo lad si Crispin ta melamelag ni. Diad pandarasal to atalibagan akatonda ya say atilak lad nunot to labat saray anak to ya sankanunot toy lupa ra, saramay lupa ran singa ra imimisan a naynay abangon may nanaugip ira. Kabebekta singa alikas ton binmegas so buek to tan minmoldag a maong iray mata to; pinminta labat ed nunot to, may katuaan, sankanengneng toy Crispin
a manalalagey ed abay na dalikan, dimad pasen a ma-
