- La vida es sueno
- La vida es sueno
- (Say bilay kugip labat)
Katubong nen Basilio, mantongging ya atumba ed taklay nen ina to. Binmetel so amin a kalamanan nen Sisa nen kanengneng ton bukbukor toy sinmabi. Onsalita komon et ag makasel; labay ton lakapey anak to et naandi biskeg to; ag met makanangis.
Kanengneng to balet ed muling na ugaw a naames na dala, akaeyag ed tanol na bosis a singa nanlapod puso ton apisag.
“Anako!”
“Ag kayo natatakot, ina!“ kuanen Basilio; “si Crispin atilak ed konbinto.”
“Diad konbinto? Atilak ed konbinto? Mabilay?”
Intangay nen ugaw ed sikato ray mata to.
“Ah!” kuanton asaltay sankabalgan ya ermen to na agla amtan liket. Mannangis, nilakap toy anak to tan inangoban to lan inangoban ed muling ton kadadala.
“Mabilay si Crispin! intilak mod konbinto..... akin balet et asugat ka anako ey? Naplag ka?” Insan to sankanengneng ya iimanoen a maong.
“Nen inawit nen sakristan mayor si Crispin inbaga ton agak makaalis ya anggad a las dies, et manlapod aralem lay labi ed satan, agko la inalagar, binmatik ak. Dimad baley patotondaen da ak niran may sondalo, inyan koy kuyat, amaltog ira tan adaplis so muling koy sakey a bala. Mapalaloy takut kon erelen daak insan daak panlinisey kuartel a pekpeken lan pekpeken a
singa ginawa rad kinen Pablo ya agmakayari nin anggad natan.”
