“Dios ko, Dios ko!” kuanen ina ya inesaes tan mankigtot ni. “Sikay angilaban ed sikato!”
Insan kuanton mansalsalita legan ton manaanap na lupot ya malimgas, danum, tuka tan bagoy dulakak.
“Sakey tamoro ni apatey da kala, apatey da komoy anako! Saray guardia civil agda nonunoten iray kainaan!”
“Ibaga yon naplag ak ed kiew, no walay manepet; ta pian anggapoy makapikabat ya ousilan da ak.”
“Akin balet et atilak si Crispin ey?” kuanen Sisan tinepet nen ayari to lan tinambal si anak to.
Saya sankanengneng ton ag inmesel a tampol, insan to nilakap tan inkalkalna ton tinongtong so inkabalang dan may onzas; agto la balet imbagay inpanpapairap dad kinen agui ton melag.
Mannangis iran sanina.
“Ay agi, saman a kalakal to! Palsaan day Crispin anta ontan lay abig ton ugaw! Lapo lagid duka itayo tan saray duka et nakaukolan ya itepel dan amin!” kuanen Sisa ed bosis a makalna ya nengnengnengen ton napnoy luay mata to may tinhoy a nanaupot lay larak to.
Ag ira inmesel a duan abaybayag.
“Nandem kala? Andi ni? Walay niluto tan tinapa.”
“Anggapoy ganas kon mangan; say danum, oninom ak labat.”
“On!” kuay Sisan inmebat a marmaermen; “amtak lan agmo labay so tinapa; sananey so intadiak a kanen mo et linmadiay amam. . . . Kasi ka met la anako a!”
“Linma ra dia di ama” kuay tepet nen Basilio ya bansag na impangimano toy lupa tan taktaklay nen ina to. Say tepet nen anak to sing-a to pinespes so puso nen Sisa, ta masulosulok so impakatalos tod labay ton ibaga, kanian magangganat a nankuan:
“Linma dia, tinetepet to kayo tan labay to kayon nengnengen; narnarasan a maong. Say kuanto so no mankalkalakal kayo ompawil la dian manayam lamet.
“Ah!” kuanen Basilion sinmalangat a pinmatnag ed sungot toy irap na linawa to.
“Anako!” kuanen Sisa ya binano to.
“Itepel yo ak, Ina” kuanton inmebat ya ag oneleelek: “agla mas maong yan bilay tayo ay so sikatayon talo labat, sikayo, si Crispin tan siak? Pannangi-
