san yo balet, — andi la sirin, ipasen yon anggapoy
inbagak.”
Nankapot si Sisa insan to tinabunay dapol iramay nakdaan a ngalab pian ag ira naerep ya aliling na gawa met na too ed liknaan to: ya sakbongan toray dapol na bilay a tatawagey ag pilpilay linawa ta piano ag ira naerep ed agewagew a pilolumog ed kaparan too.
Nandasal si Basilio insan to la indokol ed abay nen ina to ya mandarasal nin mantaltalimokor.
Say liknaan to singa ampetang balet ta nakeketel met. Sinali ton inlikdem a sankanunot to may agi ton melag a saman a labi et inilaloan to kalamor so onogip lagid akualan nen ina to, natan balet et wadman a manangis tan manggiwgiw lagid takut tod man ed sakey ya ambilbilunget a sukong na konbinto. Singa to sankarengel niramay ingal to ya dengdenglen to nen wadmanid tori, balet ta diad inkaksaway laman to singa la nankakames so kanunotan to nen bandad onor, insan la nankalkalnan akaugip.
Anengneng toy sakey a silir a sinileway duaran kandila. Si pari kura sankabenbenan toy babuyan tan dedengelen ton ambilbilunget so lupa to so ibabaga nen sakristan mayor a mangakaksion na makapataktakot. Si Crispin wadman a manggiwgiw a lingawlingaw ed biek tan biek a manlua ya singa walay aanapen ton too ono manaanap na naamotan to. Pinigaran nen kura ya tinepetan ed baleg a sanok to ya bansag na inngisiw na babuyan. Batik si ugaw a sinmanib ed kinen sakristan mayor, et saya sininkaton inegnaan ya indagon inpalewet ed kura; si pangaskasiyan a ugaw manaliweswes, mankasag, maneyag, itumba to, ontolin, onalagey, ombatik, nakaronias, natumba, tan salanggaen to may babuyan na sanduan lima to, ya nen nakna ran asugat et agto amtay gaween to lamet ya angisanib a maneyag na araldalem. Sankanengneng nen Basilion manyesyes ya ipalpalaltog toy ulo tod tabla, sankanengneng to met tan sankarengel toy babuyan a mansasiok! Nen nakalan lay ilaloy ugaw ya agto la amtay gaween to, inmalagey tan diad inkasilok to lad sakit, tinakbaan to ramay manpapairap ed sikato tan kinetket toy lima nen kura. Saya akaingal tan naikbanan toy babuyan; si sakristan sininkat toy sakey a baston tan pinekpek toy ugaw ed ulo tan saya atumban naiweng.
