kanengneng tod amin ya ibabagay anak to. Akaugip
si ugaw a nankalkalna ran kinmopit so naknaksawan a
lukablukab daray mata to, tan diad saya, samay Ole Lukoie ya sasalitaen nen sumusulat ya Andersen ed saray tungtong to inbuskag ton intarong ed sikatoy marakep a payong a pinipintaay makapalikliket.
Singa to la sankanengneng a manpapastol la ya iba toy agi ton melag; manaala ray bayawas, “alpay”, tan arum niran bunga ed takel; basilbasil irad sangasanga ya malikliksi ran singa ra kompapey; tubongtubong irad ungiungib a mankidkidiam so dingding da; manaames irad kakulosan a say gagatinan da aliwan buer no ag pinopinon balitok, tan saray batobato singa ra samay baton walad balanget na Virgen. Saray sirasira mangankanta tan manelelek ira, tan saray tamtanaman yoosdong daray sanga ran nalpey na kuarta tan bonga. Kasanlilikna anengneng toy sakey a kampana ya man bitbitin ed kiew tan andurukey a lubir a panagbintolan, tan akasinger dimad sampot na lubir so sakey a baka ya walay obong na manok ed nanpegleyan day saklor to, insan si Crispin wadmad dalem na kampana, etc. etc. Tan onian andi tonday kugip to.
Si ina balet ta aliwa lan ugaw insan ag naksawan a nambatik a sakey oras, agla akaugip.
