"Eje? kanian say kuanton may kaabay yo et inlako yoy belek to!"
"Siopa? Andi baing a bii! Makapal! Akin singa ak sikayo ya. . . . . ?"
Akaukolan ya akibiang imay maistro ya amatondad sikara, ta baboy lan ami pansasangsangan da ya alingoanan da laray Amami.
"Sia latan, sia latan, ag kayo mankokulkol ed belek labat, agági. Aligen tayo komon so ibabaga ray Masantos iran Sulsulat ya oniay kuanda: 'saray hereje tan protestante agda kinolkol si Katawan tin Jesukristo nen sinonson toran inpelag ed danum so polok na báboy da; insan sikatayo balet ya aliwa labat lan kristiano itayo no ag Hermanos itini Smo. Rosario, pankokulkolan tayoy sakey a belek? Antoy ibaga ray katagam tayon Hermanos Terceros ey?"
Anggapoy inmesel a pankelawan dan amin so kakabatan ton may maistro tan mapagpaga ra met ed nibaga ray Hermanos Terceros. Samay maistro ya nagnap so linawa to ed katotulok da, intuloy to ed sananey lan tono:
"Nagonoyan patawag itila nen kúra. Nakaukolan ya ibaga tayod sikato natan no siopay apili tid saramay inbabaga ton mansirmon: si pári Dámaso, si pári Martín onó samay coadjutor. Agko amta no akapilí laray Hermanos Terceros; nakaukolan ya amtaen ti dia natan no siopay panpapaknaan tayo."
"Si coadjutor la . . . . . "kuanen Juana ya makalkalna tan nasisikig.
"Hm! Agto amtay mansirmon nen coadjutor," kuanen Sipa; "mas maong si pári Martín." "Si pári Martín?" kuay sakey a manlemlemew; "ag narengel so bosis to; mas maong si pári Dámaso." "On, sikato, sikato!" kuanen Rufa. "No si pári Dámaso maong a mansirmon, singa nimet komediante!" "Ag tayo balet natalusay ibabaga to," kuanen Juana ya ngalngalin ag narengel so bosis to ngola.
"Onaa ta araldalem iray kanunotan to! Et dapot maong a mansirmon.
Diad saya sinmabi Sisa ya sankaagto toy buksot, angiter na maabig a kabuasan ed saramay bibii, insan sinmegep.
