"Ni, sinmegep laman ay! Itimet la!" kuan dara
nia.
Manpukal a pinasiay pagew nen Sisa ya onsesegep. Agto amtay ibaga tod kúra ya pamapás toy petang na uló to, tan anggapo met so amta ton ibaga ya pangiba ono pangilaban to bilang ed anak to. Saman a kabuasan, kaliwawa to, linmasor lan tampol ed tanamanan to ya nanborbor na sankaabigan iran pisipising ya inlugan tod buksot ya inapisay bulobulong na ponti, tan ininan to met na rosrosas. Linmad gilig na ilog a nanggetel na malanguer a bulong na pakó ta amta ton labalabay nen kúra yan gaween ya insalada. Insan to insolong imay sankaabigan lan kawes to tan amaarap lad baley a sankaagto toy buksot ya agto la binangon si anak ton Basilio.
Mankakalkalnan onsesegep dimad takayay konbinto ya mantatalineng, agla pigan walay narengel ton bosis na ugaw.
Aggapoy nangel to tan anggapo met so asabat to, kanian amaarap lad kosina.
Diman lingawlingaw ed amin a sukong. Saramay sakristan tan igaganggan iran wadman, ambetebetel irad sikato, ya agda inasikaso. Angigalang, agda lawari inebatan.
"Iner so panginan ko raniay pising ay ey?" kuanton intepel to lay aliwaliwan inpatnag dad sikato.
"Diman. anggano iner!" kuanton inmebat nimay kosiniro ya ag linmingaw, ta manbabagot na bagoy kapon.
Inggagaton nen Sisan inpandarasig dimad lamisaan iramay talon, palia, patola tan ulnos na pakó. Intatapew to ramay rosas, akaimis na samsamet insan sinmingger ed samay sakey ya igaganggan a singa mas maliwaway lupa to nen samay kosiniro.
"Nayarian ko kasi misalita ed kindi ama?" kuanton tinepet.
"Agmakayari ra," kuay ebat ton may too ya makalkalna.
"Si Crispin ey? Amta yo no walad sakristia?" Ninengneng nen igaganggan a napnoy kelaw.
"Crispin?" kuanton asilot so kirep to. "Andid mad abong yo? Paandien yo sirin?"
