"Si Basilioy wadmad abong; si Crispin atilak dia,"
kuanen Sisa ya inmebat. "Labay ko komon a pinengnengan.....
"Ha!" kuanton may igaganggan; "atilak a tua, balet ta binmatik a nantatakew na nambabangil. Imbaki ak nen kúra natay kabkabuasan ed kuartel ya angibagad Guardia Civil. Wadman lara angankod abong yo natan ya anapen da ramay ugugaw."
Pinepet nen Sisay sanduan layag to, tan sinmangi ya walay labay ton ibaga, et anggaman manggalaw so bibil to, anggapoy pinmaway a tanol.
"Agay lara tay ának yo a!" kuanton may kusiniro. "Mapatpatnag ya agyo insalat so asawa yo ta saratay ának yo ay et anggapoy duma rad kinen ama ra. Say alagar yod tan no napalakbatan tonin may melag si amá to!"'
Inggapo nen Sisay mannangis ya inyurong tod mad sakey a banko.
"Agki dia onnanangis!" kuanton iningalan nimay kosiniro. "Agyo amtan agmakayari ra di amá? Lakayod mad lansangan ta diman kayo onakis!"
Si pangaskasíyan a bii intotulaktulak dan anggad leksab na takayan a karingan toran inmakseb iramay hermanas a maneesaesan iran kukutengtengen day sakit nen kúra.
Samay masegsegang ya iná insakbong toy panyo tod lupa to tan pinokpokan ton pinaer so pannangis to.
Kapaway tod lansangan, lingawlingaw a singa manduaruwa insan imanlan magangganat a singa anunotan to la no antoy makanan gaween to.
