- El vulgo es necio, y pues lo paga, es justo
- Hablarle en necio para darle gusto.(1)
- (Lope de Vega)
Samay libsong ya aliktob na kapalandeyan, mareereen a naugip a mankonwarin singa anggapoy ginawa ton balot anta nen inbeneg a lábi et inmalsá ray daluyon ton akibabali met ed bagyó. Kapanliwawa, ya say onan sindag na agew et gapoan to lan liingen iray inkantadan mankidkidiam dimad danum, napaaninagan lan nanengneng dimad arawrawin singa nanabetay tawen tan dálin so singa burarog niran baluto ray sumisigay a gúyoren da laray inlolusor dan iket; tan ontan da met na ankabaleg a sakayan tan paraw ya ibuskag da laray láyag da. Duaran lakín baliwan, osusdongan dan andi esel imay danum a manlapod mad panalalageyan dan pukdol; sakey ed sikara si Ibarra tan samay iba to sakey a balolakin wala nid kalangueran a nengneng toy maoyamo tan maerermen ya inpanlupa. "Diad sayan pasen," kuanto niay unor, "diay angibantakay bankay di amá yo. Diay angiakaran tod sikami nen Teniente Guevara may sepulturiro." Binenbenan nen Ibarran minesmes so lima ton may balolaki.
(1) Saray kabanyakan mureng ira, tan lapod sikaray manbayar, manepeg a pisalitaan iray minumureng pian napagustoan ira. Sikatoray inebat nen Lope de Vega, sumusulat a kastila, ed saray manbabalaw ed panagsulat toy ayayam. Tan nanlapad saman ankakanan panangibaga ed dinan man a kimey a say manggagawa et agto totuntoney makanan panaggawa no agta totumboken toy panaglabay na karakian a kulang iray pakatalus, depot labat pakalmoan toy kuarta
