"Agyo nepeg a pisalamatan ed siak!" kuanto nia.
"Dakdakel so utang kon linawad kindi amá yo tan
anganggad nibales koy impiponpon ko nen inatey ira.
Sinmabi ak dian anggapoy kabat kon anggan siopa, anggapoy angirekomindad siak, tan anggapo met so nikinon
kon ngaran ko tan kuartak a singa met natan. Say
sinalatan ko, inmekal a manbabangat ta nankomirsioy
tabako. Di amá yo tinulongan da ak, inanapan da ak
na abong, tan inter dad siak ya amin so nakaukolan ed
ibolaslas na pambangat. Onla rad eskuilaan no arum,
tan ikikdan daray kuartan daiset iramay maseet a manaral ya anggapoy nayarian da, tan no arum pati liblibro
tan papil. Balet ta saya, ya singa amin a maong a pamaakaran ag nagnayon."
Inekal nen Ibarray sombriro to tan singa nandasal ya abayag. Insan inmarap ed samay iba to ya nankuan:
"Kuanyo ya di amák et totulongan da ra nen saman iramay ugugaw a mairap. Natan ey?"
"Natan gagaween day anggaay nayari . . . . mansulat ira no nayarian da," kuanton inmebat.
"Antoy makasengeg ey?"
"Say makasengeg saray aysing dan apilatpilat tan
kabábaingan dan mapatpatnag ed matá ra."
Ag inmesel si Ibarra.
"Pigaray babangatan yo ey?" kuanton tinmepet lamet.
"Masulok a duan lasus so walad listaan, say ono- urong duamplo tan lima."
"Panoy kagagawa ton tan ey?"
Akaimis na maerermen si maistro ya nankuan:
"No tungtongen kod sikayoy makasengeg andukedukey tan onalipanes kayo labat."
"Agyo komon ipasen so tepet kon anak labat na panagusisa," kuanen Ibarran mabinbinta ya matá toray akaarap ed arawrawi. "Akapanmotektek ak a maong tan isipen kon mas makana nin ilulot ko ray kanunotan di amák nen say nangisan koy impatey da tan ibales kod saray amaunong ed sikará. Say lubok da gaway Amalsá, saray amusol ed sikara, say báley tan sakey a pári. Itepel koy akaona nisengeg ed agto pikakabat, tan galangen ko yay komadua lapod kipapasen to, tan manlapod pilaleko lawas a nagalang so Religion ya akapangibangat ed polok day katoowan. Pilalek kon natumbok
