Tan kayari ton nansalitay onia, intewek toy daiset
so ulo to ya imisimisan.
“Sitatalineng kamin manaalagar na ibaga yo!” kuanda ranmay kakaaron binibitla to tan arum niran totoon wadman ya ipapasen dan maong a mansalita; saramay mamatatken sigamsigam iran malikeliket so linawa ra ya panaaplosan daray lima ra.
Si Kapitan Basilio, kayari ton pinunasay linget to na panyolito ton sutla, inkuanton intuloy:
“Bangta ontan lay abig na linawa yo tan panama gusto yo ed magter ya inkasiak aya, ya inabuloyoy pansalitak kasakbayay siopaman ed saray wadian akaarap, samboten koya sirin ya abuloyon inpagamor ed siak, tan gapoan koy manbalikas. Singak nanaisip ed inka siak a dili ya wala ak bilang ed utel na sankatageyan a Senado Romano, senatus populusque romanus ya ikukuan ed saramay linmabas lan marakep a panaon a diad kasegsegangay talbay katoowan et agla ra napapawil, tan kerewen kod saray 'Patres Conscripti'(1) ya singa ikuanen makabat a Cieeron(2) no sikatoy wadiad pasen ko natan, kerewen ko kuankon uliten lamet, a maniapod kakulangan tayoy panaon, ta say panaon lanti et alimbaway balitok imong na inkuanen Salomon,(3) a diad sayan makabaliksan a salitaen dia natan et sakey tan sakey komon iparungtal toy kanunotan to ed malinew, antikey tan aliwan masuliwet a panagsalita. — Salamat—”
Tan nagnap ed liket na linawad inkasikaton dili, tan ontan met ed inpantalineng day wadman, si nantalumpati kasakbayan ed inyurong to, pinasekiapan toni ag mangitaltalek a kanenengneng si Ibarra ya wadman a manyuryorong ed sakey a suyok, tan ontan met a nilimgis to ray kakaaro to ya singa bilang mankuan: “Ha! Nadnaasirtak, anto?”
Saraman a kanunotan to singa ra met inmaninag ed mata ray kakaaro to nen nilimgis da ramay tubonbalo ya singa dara bilang pateyen ed pakaibeg tan siblet.
“Natan sirin nayarin ontumbok a mansalitay malabay ya
ehem!” kuanen kapitan ya agto
__________
(1) Senadores ed Roma.
(2) Nibantog a sankaabigan a managtalumpati ed Roma.
(3) Komatlon ari ed Israel, ya anak nen arin David, tan nirayrayew a nibantog ed kakabatan to.
