met ya awit daray sankaabigan iran manok dan ibubulang, tan say liampo, tan nipis, manepeg met ya walay
bulang a labinlimay agew, tan say pangiabuloy na panlukas na amin ya abong a sugalan............ ”
Inmaalagey iray tubonbalon ag lara akakpel, ya inisip dan nanaambagel lay teniente mayor. Mansusupiat met iramay mamatatken.
“Tan diad kaunoran pian ag met napauliay gayagay kamarerua......... ”
Atabonan so bosis to ed ingal a nanbabansag a nanlapod amin a sukong ton may salas, tan gulon baleg so asumpalay salitaan.
“Andi!” kuay sakey ya ag mangiter na punget a conservador; “agko labay a napabaleg toy inkasikaton dilin nibagan sikatoy angikorang na pista. Abuloyan yo ak a mansalita, abuloyan yo ak!”
“Niloko itayo nen Don Filipo!” kuanda ranmay liberal. “Ag tayo ibotos itay labay to! Akitipon ed saray mamatatkenI Ag tayo botosan!”
Si kapitan ya nengneng to lay nalelemay, pappaulian to ra ya anggapon balot so ginawa ton pamapawil toy deen: aalagden to labat so labay dan itonda.
Samay Kapitan day cuadrilleros kinerew toy pansalita to; inabuloy da, balet to anggapoy nibaga to, tan inyurong to lamet ya agto amtay gaween tod baleg ton kababaingan.
Kanalpalaran ta inmalagey si Kapitan Valentin, a kabkaabigay panagnunot ed saray conservador tan inkuanto:
“Ag tayo nayarin akoen so inparungtal nen teniente mayor a kanunotan ta say pakaisip tila so alablabas. Sakey labat a tubonbalo, ya singa si teniente mayor bi lang, so makanggabay na ontan lan karakel na bomba tan komidia, ta sikato lagi nayarian to ni manpuyat a labi-labi tan mandengel na mankilalbong ya ag natelek. Kinerew koy panagnunot daray wadian totoon nagnap ed kalakal, tan amin da anggapoy onabubon ed kanunotan iran inparungtal nen Don Filipo. Aliwan tua ya kakaarok iran pinabli ? ”
“On! On!” kuandan nandiringan so tubonbalo may mamatatken, a saramay tubonbalo ontan lay inkaayapan da ed inpakangel day sakey a matatken a nansalitay onman.
