Intangay toray mata tod tawen, samay tawen a
singa manimimis ed liwawa ton sankarakpan; ankekelag
iran amusiak a lurem so singa manlanglangoy ed inanagan a sankalinewan. Tinmonda ta labay to komon a
pukpokan so panggiwgiw na kalamanan ton amin.
Ompapaway iramay sondalod abong a bokbukor da ya walan sankaawit da labat imay nganak a patatabaen nen Sisa. Saya akalinawa tan apabiskeg toy inkasikato.
“Agay lay abig da tan panangasi puso ra!” kuantod bosis ton makalna ya makakaakis ed liket to.
Anggano saramay sondalo et pinoulan dani may abong to dapot labat agda inerel iray anak to, bendisionan to niran siansia. Diad baleg ton pisasalamat inta ngay to lamet iray mata tod tawen a peles a dadalney nipalenpen iran dulakak ya aliling na buskag a payak day maimpis tan maples iran lurem na tawen tayo diad Pilipinas, tan intobat toy akar ton singa pinmelnak ed puso toy sekder tan ilalo.
Nen manasingger lad saraman a tatakutan a totoo, singa ag nankabatkabatan, lingawlingaw ed biek a singa agto nanenengneng imay nganak ton mankakak kalamor a singa papailaban. Kapilegiasan tod sikara, iyan to la komoy kuyat balet ta binenbenan toy linawa ton nanakar na susto.
Agni lan lamang akaarawi nen nangel ton tinawag dad makapakebiew a bosis. Akigtot, balet ta intuloy toy panaakar ton singa bilang agto nangel. Tinawag da lamet ya inkasikasil da tan tekep toy salitan maramsak. Apasout a linmingaw, ya ampotipoti lupa ton manggiwgiw. Kakaweyan ton may sakey a guardia civil.
Sinmingger si Sisan singa agto amtay gagaween to ya singa apagpag so dila tod inkataktakot to tan singa amagaan so kolokulong to.
“Ibagam so tua ono andi itaker mi kad saman a kiew ay insan mi ka paltogen!” kuay sakey ed sara may guardia civil ed bosis ton mamagiaw.
Ninengneng nen Sisa may inturo ton kiew.
“Sikay ina daran may mamatakew, anto?” kuan ton tinepet imay sakey.
“Ina ray mamatakew!” kuanen Sisan tinumbok a singa agto amtay ibabaga to.
“Iner so kawalaay kuartan inter day anak mod sika kalabian?’’
“Ah! say kuarta....."
