“Agmo papaandien ta lalon kaskasian ka!” kuanton
intuloy nimay sakey. “Linma kami dian erelen iray
anak mo, et akabatik imay panguloan. Iner so angiamotan mod samay yogtan?”
Kangel nen Sisad saya, akalinawa.
“Mama!” kuay ebat to; “abaybayag lan agew ya ag koni anengneng si anakon Crispin; say ilalok nanengneng kod sayan kabuasan dimad konbinto et inbaga rad siak diman a.....”
Nannengnengan iramay duaran sondalo ya singa ra nantalusan.
“Eh .... maong!” kuanto lamet nimay sakey; "iter mod sikami tay kuarta ta agmi kala gunigonen.”
“Mama!” kuanton mikakasin man a masegsegang a bii, "ag ira mantatakew so anako ya anggan narnarasan ira, ta aliwa lan balod sikami, pasal mi lay naerasan. Anggapoy insempet nen Basilion anggano saksakey a kuarto; onaan yon ami abong mi tan no makalmo kayoy anggan saksakey ya ikapat, salay labayon gaween ed sikami. Sikamin duka. aliwa kamin matakew ya amin!”
“No ontan sirin,” kuay inebat ton may sondalon matantantan a sineleng toy Sisa, “mila kad sikami; ompaway a siansia ratay anak mo tan ipawil datay tinakew da. Mila ka!”
"Siak? mila ak ed sikayo?” kuanton makalkalna ya akasuner tan sankanengneng ton napnoy takut so kawes daran may sondalo.
“Akit andi ey?”
"Ah! abagey yo ak la kari!" kuanton mikakasi a ngalngali lan mantalimokor. “Mairap so panbibilay ko, anggapoy balitok ko, anggapoy kagawaan kon niiter kod sikayo; anganggad walad siak satay nganak ay a nunot kon ilako et inala yo met la awit yo lan amin so walan naalmo yod tan ed alulong ko, balet ta agyo ak la aawiten, paulian yo ak la dian ompatey!”
“Balap! Nakaukolan a mila ka tan no agka ontumbok a maniapod linawam, baloren mi ka!”
Inian nen Sisay ugaog. Saramay sondalo ag ira mangompang.
“Abuloyan yo ak sirin ya unonay daiset!” kuan ton mikakasi nen alikas ton sininkat dan andi panangasi ya itutolak.
