Saman labat so agaylay dukey na inpakalikas tod saman
a dalan.
Diman ed gilig, wadman a tinmuboy masalsalindak a sengeg na kawayan a diad sirum toy panagpainawaan to nen agew iran limnabas; diman met no arum so pitotungtongan tod inaro to, ya saya et ibaan ton manawit na buksot ono babakd ya nankargay bungabunga tan pisipising. Ay! limnabas iman ya singa labat kugip; nankasal iran saninaro, aturon anakbanway asawa to, tan diman la ginmapoy segsegang tod bilay.
Maniapod ampetang lay agew, tinepet daran may sondalo no labay toy manpainawa.
“Andi, salamat!” kuanton inmebat a napnoy paga tan takut.
Say insabi lay pinaspasian takut ton tua nen asingger larad baley. Ampaipait so nalilikna ton irap; biek tan biek sankanengneng toy maawang iran papageyan, sakey a banawang a dadalney paranom, tan kiew iran ag binmaleg a namamagaan. Anggapoy anggan kelas a nataboyan to, ono anggan sakey labat a baton baleg a nayarin pangipaspasan toy laman ton dili! Sinmabi babawi tod impila tod saramay sondalo ya anggad sa man a pasen. Anapanapen to may ilog ya aralem a managos dimad abay na alulong to, ya alay samit lag! ipapatey diad itaboy a maniapod atagtagey iran nantopag a pangdel to ya napnoy mautok tan makmakdem iran bato! Balet ta diad impakanunot tod saray anak to, lalo lad Crispin ya agto ni kabat so asumpalan to, singa asileway kanunotan tod onman lan akaliktob a kabilungetan tan naitday tepel a nibaga ton makalkalna:
“Naani naani onia kami lan manayam dimad utel na katakelan!”
Pinunasan toray lua to, pinukpokan toy liknaan ton anggaay nayarian to, tan inmarap ed saramay son dalo ya nankuan a makalkalna: “Wala itilad baley!”
Say bosis ton angibaga ag nabaliksanan; singa bi lang sakey a dalem, tetel, eyey; sakey a pikakasi ono nantitipkel a kaermenan a nibesngaw.
Naplag so panangasi daran may sondalo tan insinyas day abuloy da. Si Sisa nanggangganat a ginawa toy anggaay nayarian ton pangipatnag ton singa bilang anggapoy walawala.
