Taloy agew lay linmabas nanlapod saray dinmadalan ya agawgawa; taloy agew ya inkana ray mibabaley ed San Diego ya impanparaan ed arapen a pista tan ontan met ya inkana ran inpankutengteng, tan inpantaltalabutob.
Legan dan singa la nananamen so pasasabiyen a likeliket, wala ray mantatalabutob ed kinen kapitan, saray tubonbalo, tan agmet lad tan asapoy ipapakasalanan toy amin a nagagawa ed amin a too.
Kukutengtengen day insabi nen Maria Clara ya kaulop nen Tia Isabel. Panliliketan da ta inararo ra lanti, amamayoen day onman lan kalimgasan to, tan pankelawan da met so kakaumay walna tan kagagawa nen pari Salvi — “No arum nababalang legay misa; agto kami la pitotungtongay andukey, mapatpatnag a manebeng tan lalon ag oneseesel,” kuanday maasingger ed simbaan. Ontan met so ibabagay kosiniro to, manebeng ya inagewagew tan samsamet so kakanen to. Et say sankakelawan day totoo, ya kutengteng dayan baleg, say akin et walay silew natan ed konbinto ya duara nimet legan nen pari Salvi ya onpapasiar ed sakey ya abong diad abong nen Maria Clara! Saramay bibiin mararasal kuros laran kuros, balet ta ag met ira ontundan mantatalabutob.
Si Crisdstomo Ibarra nantelegraman nanlapod kapital na luyag ya angilugay ed kinen Tia Isabel tan si kaanakan to; balet ta anggapoy inbaga ton nipaakar ed agto kiwalad man. Dakel so maniisip a nipangaw nisesengeg ed ginawa tod pari Salvi nen ngarem na Todos los Santos, tan lalon pinmalaloy kutengteng nen anengneng day ngarem na komatlon agew ya inmepas ed luganan ed petek na abong na inaro to, tan inlugay ton magalgalang si pari Salvi ya onia met diman.
