Nipaakar ed Sisa tan saray anak to anggapo lay
mangaasikaso.
No ontuloy itayo natan ed abong nen Maria Clara ya aliling toy marakerakep ya ubong ed utel day sengeg na lukban, dalandan, naranjita, tan ilangilang, nasabian tayo nira nen Crisostomo ya manantandag ed dorongawan ya arap ed dayat, ya asaniban iray rosrosas tan tanaman iran inpapakalab ed kawayan tan kawat ya mansamsamiong so balingit da.
Wadman iran mantotungtong na makalkalna ya aliling na bosis day esaes day bulobulong, tan saray ompapaway ed bibil dan salita lalo ni balingit da nen say dagem ya onsisibok dimad jardin a tarok toy balingit day karosasan. Sikatoyan oras so saray inkantadan manaayam ed saman a dayat et samboten day ibibilunget na masiglat ya iseselek na agew a pangitangulaw day malimgas tan magayagan lupa ra ed tapew day daldaluyon, a panamayo tan pangilugay dad masamsamit iran kanta ra ed agew ya onseselek la. Kuanda ta say kolor na mata ra tan buek da inanagan, tan nanbabalanget iray tamtanaman ed danum, a rosas day ampoti tan ambalanga; kuanda met ta no arum diad ibuskag na daluyon nanengneng so asimsimbang ya inkalaman da ya lalo nin ampoti lawari nen say dilin buray daluyon, tan diad kaselek na agew tan kabalkot lay dalin na bilunget na labi, gapoan dalay manggagalaw. tan diad ontan narengel lay matamoy tan maananlay iran tanol ya aliling day tugtog na arpa; kuanda met. .... et maya ta pawilen tayo ramay saninaro pian narengel tayoy sampot na tuyawan da. Kuanen Ibarra ed Maria Clara:
“Nabuas na palbangon nasumpal so pilalek mo. Sa yan labi iparaan kon ami nakaukolan pian anggapoy onkulang.”
“No ontan sirin sulaten ko laray amimigak pian makapanparaan ira. Gawam so anggaay nayarian mo pian ag makapilay kura!”
“Akin ey?”
“Onaa ta singa to ak babantayan. Asfko labalabay iramay mata ton nikukundalem ya ambilbilunget, no inengneng to rad siak singa ak natatakut. Insan no pisalitaan to ak say bosis to ya nanbabangil nimet so ibaga ton dumaduma, ag natalusan, sansananey
