baley, say pista; nananap na baraan toy Maria Clara
tan pinmaliis la.
“Siansia lan nasasalita tayoy pista, abuloyan yo ak pan mamagad sikayo ed sakey met a pistan gaween mi nabuas. Sakey a "piknik” ed paway na baley ya imparaan min sankakaaro.”
“Iner ey?”
“Say labay day mamarikit diman ed kulos ya ondadalan ed kaabay a takel, dimad asingger ed baliti; kanian nakaukolan ya onbangon itayon masaksakbay pian ag itila napawayay agew.”
Singa nannunot si pari, insan inkuanto:
“Makatuktoksoy impamaga yo tan eselan ko ta pian ditan yo nanengneng ya agta kayon balot iirapey linawa. Agak balet makapibansag no agta ontumbok ak la no asumpal ko laray nabebetangan ko. Mapalpalar kayo ta anggapoy makaskasbel ed sikayo, ag kayo ataker!”
Nagugunoyan ed saya nanpatanir lay Ibarra ta say pangiparaan toy "piknik” ed kaimbuasan. — Lablabi lan maong.
Diad lansangan sininggeray sakey a toon angilugay ed sikaton magalgalang.
“Siopa kayo?” kuanen Ibarra.
“Agyo kabat so ngaran ko, sinyor,” kuanton inmebat nimay too. “Duay agew takilan tatalaranan.”
“Akin ey?”
“Anggapoy mangasid siak, sinyor, ta say kuandan amin so sakey ak a matakew. Agko amtay nakar day anako, naambagel so asawak, et amin a too ibaga ran perak konoy nagagawak.”
Ninengneng nen Ibarran agano tan kuanton tinepet:
“Antoy labay yo natan ey?”
“Kerewen ko komoy panangasi yod asawak tan saray anako.”
“Agko nayariay ontunda ta manaapura ak,” kua nen Ibarra. “Mila kayod siak no labay yo ta tungtong
yod siak so agawa yo legan tayon manaakar. ”
