Mankidkidiam niray bitewen ed katawenan tan naugip niray manok ed pinukokan daran sanga ray kakiyewan, nen nitan laran malikeliket so totoon nanoulop a manaakar ed lansangan a mamapaarap ed libsong ya a wit daray silew a brea ya ingangaray huepes.
Limara rayan mamarikit a manaakar iran masigsiglat ya nantatabinan ono nanlalakapan ed balambang, tan tomtumboken iray pigaran akukulaw tan igaganggan a nanaagtoy buksot a napnoy nambabangil a kakanen, liplipong, tan arum ni. Diad pakanengneng na lupa ran manelelek a maligliga tan napnoy ilalo; diad pakamurya na makapakapal a buek dan andeket ya ipapalirpalir na dagem tan saray mabuskag a sapey dan pinipiligis na malalapar, nayari ran isipen a diosa ray labin ibabatikan day agew, no ag tayo labat amta ya anggapoy arum ed saraman no ag di Maria Clara tan saray apatiran amimiga to: si maligan Sinang, si kapinsan to ya mabinbintan Victoria, si malimgas ya Iday tan si lawas sinonunot a Neneng, a kalimgasan toy masimsimpit tan mareen.
Mantotungtong iran masaysayaksak, — maneelek ira, karutan da, maneesaesan ira insan ira manpandak.
“Bangonen yoy amin a totoo anta masamsamit ni ugip da!” kuanen Tia Isabel a mamapasnok; “nen sikami ugugaw ni anggapo Iatan a gulo mi.”
“Ag kayo met anganko onbabangoy masaksakbay a singa sikami, tan aliwa met ira angankon maugip so mamatatken nen saman!” kuanen masansanting a Sinang.
Ontonda ran magano, ikalna ray pantotungtong
da, nagugunoyan balet nalingoanan dala tan iyan da lamet so elek, a makmakbaw ed lansangan so pantotungtong da.
