may inyan a tarong a nisaletsalet met irad rosrosas tan
bungabungay pinya, maloko, ponti, bayawas, lansonis,
tan arum ni. Impaawit nen Ibarra met diman iray
alpombra, makakapal iran kortina tan ankabaleg iran
almoadon ya inaapiger ya impapasen a yurongan day
bibii. Pati saray teken tan begsay pinaparakep. Dimad
samay baluton apalabiay parakep wadmay sakey ya
arpa, pigaran gitara, akordion tan tambuyog a saklor
na dueg. Dimad biek wadman iray dalikan a peles a
pangipaparaanay tsa, kapi, tan tajo ya onkanad almosal.
“Dia ray bibii, diman iray lalaki” kuanda ranmay kainaan nen kalulugan, “Mandeen kayo! Ag kayo magalaw ta nateneb itayo!”
"Manguros kayo ni!” kuanen Tia Isabel ya inmona lan anguros.
“Awatan et bokbukor mi dia a?” kuanen Sinang a kinmuliseng. “sikami labat? Aray!”
Say akasengeg ed samay aray! ta kinarut nen ina to.
Mankakalkalna ramay baluton onaarawid gilig, a mananinag iramay silew na parol ed samay malinlinak a danum na libsong. Onggagapd met lan ompepelnak so liwawad letakan.
Anggapoy kitakitaw; saramay bibii tan lalaki ya impansiyan daran may kainaan, singa ra manoumameng.
“Asikasom!” kuanen Albinon maingal ed samay sakey met a balolaki. “Igatin mon maong itay bonot a wadtan ed silong na salim!”
“Akina?”
“Onaa ta ompano naekel, ontubong so danum; akamayamay so abot to niay baluto ay.”
“Ay, onlereg kami la,” kuandan maningal iramay bibiin ataktakot.
“Ag kayo labat mapaga!” kuanton may nanseminarista ya pakekepaen toy takot da. “Ag onlereg itay kawalaan yon baluto, ta limlimaray abot to ya aliwa met iran ankakabaleg. ”
“Limaran abot, Jesus! Labay yo kami sirin a ipalner?” kuanda ranmay bibiin lalon alour so takut da.
“On, limlimara labat ya oniay kinakabaleg da ay!” kuanto lamet nen seminarista ya intagey toy lima ton impanengneng so limpek a nagaway tangan tan tamuro
