ton nantekep. “Igatin yon maong iratay pulet ta pian
ag ira itolak na danum.”
"Diosko! Marian Sankasantosan! Onloloub lay danum ! ” kuay sakey ya akulaw a singa nalilikas ton nababasa.
Agulo ray daiset; maningal iray arum; saray arum nonunoten dalay itaboy dad danum.
"Gatinan yon maong iratay pulet ditan ay!” kuan lamet nen Albino ya inturo to may banda ray mamarikit.
“Iner? Iner? Ay Katawan! Agmi amta! Panangasi yo, gali dia ta agmi amta no iner!” kuandan mikakasi ranmay matatakot a bibii.
Akaukolan a limaran lalaki so binmasil dimad biek a baluto pian napapay takut daran may kainaan. Tan agay lay inkibanbana ya singa sa labat so kawalaay kaatapan et diad pasen a kawalaan daran may mamarikit; dimad banda ray akukulaw anggapoy anggan sakey ya abot. Tan lalo ni lamet a nibanbana ya si Ibarra et akayurong ed abay nen Maria Clara; si Albino diad diking nen Victoria, etc. Pinmawil so kareenan ed kawalaan daran may mapagan kainaan balet ta naandid pasen day tubonbalo.
Maniapod mareereen so danum insan asingger met lay kawalaan daran may koral na sira, apaabig dan itonda ni pansasakay ta manalmosal nira. Inerep da met lara may parol ta maliwawa lay kabuasan.
“Anggapo lay makapiparad tajo ya inomey kabkabuasan kasakbayay pimisa!” kuanen Kapitana Tica ya ina nen masaysayaksak a Sinang. ‘Tnom kayoy tajo insan yo panganay poto, Albino, nengneng yo no ag onsabi pati ganas yon mandasal.”
“Sikatoy gaween ko,” kuanto nian inmebat, “ta nunot koy mankonpisar.
“Aleg!” kuanen Sinang, “inom kayoy kapi ta makapaliket na kanunotan.”
“Tamtampol ta singa nanaermenan ak nimet.”
“Makapoy itan!” kuan met nen Tia Isabel a sinmalabat; "inom kayoy tsa insan yo panganay galyitas; ta say kuanda man et makapareen konoy nunot.”
“Dali, oninom ak met na tsa tan panganan koy galyitas,” kuay ebat nen mapaguston seminarista. "Kapalpalaran ta anggapod saratan ya iinomen so Religion Katolika.”
